सहिद स्मारक ‘बी’ डिभिजन लिगको तयारी गरिरहेको झापा ११ फुटबल क्लबले सहिद स्मारक ‘ए’ डिभिजन क्लबको च्याम्पियन चर्च ब्वाइज युनाइटेडलाई २–१ ले हराएको छ । शनिबार मेची रंगशालामा भएको भइरहेको भद्रपुर झापा गोल्डकपको क्वार्टर फाइनलमा झापाले चर्च ब्वाइजलाई पराजित गर्दै लिगको तयारी उत्कृष्ट रहेको सन्देश दिएको छ । सेमिफाइनलमा पुग्ने क्रममा झापालाई जिताउन एरोन थापा र कप्तान पेमा तामाङले समान एक गोल गरे ।
चर्च ब्वाइजको तर्फबाट विक्रम धिमालले एक गोल फर्काए । दोस्रो संस्करणमा सेमिफाइनलमा प्रवेश गर्ने झापा दोस्रो टिम बन्यो । यसअघि आयोजक भद्रपुर ब्लेजर्स पनि अन्तिम चारमा स्थान बनाएको छ । झापाले चर्च ब्वाइजलाई पछिल्लो एक महिनामा दोस्रोपटक हराएको हो ।
८ माघमा भारतको सिक्किममा भएको १०औँ अल इन्डिया चिफ मिनिस्टर गोल्डकपको फाइनलमा पनि झापाले चर्च ब्वाइजलाई हराउँदै २० लाख भारतीय रुपैयाँ हात पारेको थियो । आइतबारको तेस्रो क्वार्टरफाइनलमा न्युरोड टिम (एनआरटी) र बंगलादेशको काउरन बाजार प्रगति संघबिच खेल हुनेछ ।
लिगअघि लयमा झापा
सहिद स्मारक बी डिभिजन लिग खेल्ने तयारीमा रहेको झापा पछिल्लो समय उत्कृष्ट लयमा देखिएको छ । बी डिभिजनको तयारीस्वरूप खेलिरहेको झापाले उत्कृष्ट प्रदर्शन गर्दै आइरहेको छ । झापाले भद्रपुरमै लिग च्याम्पियन चर्च ब्वाइज र उपविजेता मच्छिन्द्रलाई पराजित गरिसकेको छ । कुनै समयको मोफसलको सर्वाधिक सफल क्लब झापा–११ केही सयम सुस्ताएको थियो ।
तर, पछिल्लो समय झापाले पुनः आफ्नो पुरानो विरासत फर्काउने लक्षण देखाएको छ । बी डिभिजनका लागि तयार पारिएको ‘सेट’ टिमले पछिल्लो समय निकै राम्रो खेल प्रदर्शन गर्दै आएको छ । खेलमा सुरुवाती अग्रता झापाले नै गरेको थियो । खेलको १४औँ मिनेटमा चर्च ब्वाइजका डिफेन्डर र गोलकिपर कृशल मोक्तानको गल्तीमा झापाका एरोनले गोल गरे । एरोनले मैदानको मध्यभागबाट बल अघि बढाउँदै करिब २५ यार्ड टाडाबाट गरेको प्रहार गोलमा परिणत भएको थियो । तर, खेलको ४१औँ मिनेटमा झापाका प्रदीप बुढाथोकीले चर्च ब्वाइजका सुजन डंगोललाई फाउल गरेपछि पाएको फ्रिकिकमार्फत चर्च ब्वाइजले गोल गरेको थियो ।
करिब ३० यार्डबाट चर्च ब्वाइजका कप्तान एरिक विष्टले प्रहार गरेको फ्रिकिकलाई सदुपयोग गर्दै विक्रमले गोल गरे । खेलको ७९औँ मिनेटमा झापाले दोस्रो गोल गर्दै जित निश्चित गर्यो । मैदानको मध्यभागबाट आएको बललाई क्लियर गर्न अघि बढेका चर्च ब्वाइजका गोलकिपर कृशलले पञ्च गरेको बलमा करिब १८ यार्डमा रहेका झापाका कप्तान पेमाको प्रहार गोलमा परिणत भयो । घरेलु दर्शकको राम्रो साथ पाएको झापासामु लिग विजेता चर्च ब्वाइज कमजोर देखियो । चर्च ब्वाइजका कप्तान अनन्त तामाङ, रोहन कार्की, समीर तामाङजस्ता खेलाडी एनएसएलका लागि विभिन्न क्लबको मार्की खेलाडी भएर जाँदा उनीहरूको अभाव टिममा देखिएको छ । यसको फाइदा झापाले उठाएको हो । खेलभरि चर्च ब्वाइजले खासै आक्रमण बुन्न सकेन । झापाले भने दर्जनभन्दा बढी आक्रमण विपक्षी टिमको पोस्टमा गर्यो ।
सेट टिमले सहज भयो : अंगुरकुमार खड्गी प्रशिक्षक, झापा–११
यी खेलाडीले सँगै खेलेको पनि धेरै भइसक्यो । सेट टिम हुँदा ठुला क्लबसँग पनि हामीलाई खेल्न सहज भएको छ । योभन्दा अघि मच्छिन्द्रसँगको खेलमा पनि त्यस्तै भयो । बाहिरको खेलाडी ल्याएर थप्ने हो भने सायद खेल यस्तो राम्रो हुने थिएन । खेलाडीसँग व्यवस्थापनको ठुलो अपेक्षा छ । व्यवस्थापनले केही अभाव हुन दिएको छैन । हामी क्लबको अपेक्षा पूरा गर्न लागिरहेका छौँ । सेमिफाइनलमा पनि हामी राम्रो खेल प्रदर्शन गर्छौँ ।
खेल जुध्दा हामीलाई समस्या भएको छ :सविन डाँगी , ब्यवस्थापक, चर्च ब्वाइज
धेरै खेल जुधेका कारण हामीलाई समस्या भएको छ । मुख्य टिम हेटौँडामा छ । शुक्रबार हेटौँडामा खेल थियो । शनिबार झापामा हुँदा सबै खेलाडी उतार्न नसक्नु र एनएसएलको अक्सनका कारण पनि समस्यामा परेको छ । अहिले क्लबलाई जताततै खेल जुधाउँदा नतिजामा समस्या आएको छ । हामीले यहाँ हाम्रो पूरा टिम ल्याउन सकेनौँ । प्रतियोगिता जुध्दा खेलाडी संकलन गरेर खेलाउनुपर्ने भयो । त्यसले नतिजामा समस्या ल्यायो ।
