दुईजनाको ज्यान जाेगाउने चणिकलाललाई प्रदेश सरकारले डेढ लाख नगदसहित सम्मान गर्ने

शनिबारको अविरल वर्षापछिको बाढीले ललितपुर महानगरपालिका– २५ सुगमटोलस्थित नक्खु खोलामा बग्दै गरेका दुईजनाको ज्यान जोगाउने काभ्रेका चणिकलाल तामाङलाई बागमती प्रदेश सरकारले नगदसहित सम्मान गर्ने भएको छ । बागमती प्रदेशका मुख्यमन्त्री बहादुरसिंह लामा तामाङले आफ्नो ज्यान जोखिममा पारेर पनि अरूको उद्धारमा खटिएका चणिकलाललाई प्रदेश सरकारका तर्फबाट नगद डेढ लाखसहित सम्मान गर्ने जानकारी दिए । उनले चणिकलालको साहसले बग्दै गरेका दुईजनाको ज्यान जोगिएको भन्दै प्रशंसासमेत गरे ।

मुख्यमन्त्री लामाले चणिकलाई टेलिफोनमार्फत साहसिक कामका लागि धन्यवाद दिएको बताउँदै प्रदेश सरकारले नगदसहित सम्मान गर्न लागेको जानकारी गराएका छन्। काभ्रेको तेमाल गाउँपालिका– ९ चोकटारका तामाङले गत शनिबार नक्खु खोलामा बग्दै गरेका रौतहट जिल्लाका राजु साहकी छोरी ६ वर्षीया मेघना साह र राजुका भाइ २२ वर्षीय राज साहको उद्धार गरेका थिए ।

‘विपत् प्रतिकार्यमा चणिकलालले खेलेको भूमिकाले नागरिक स्तरमा समाजसेवी भावना जागृत गरेको छ । उनको साहसिक कामले विपत् व्यवस्थापनमा आमनागरिकले कस्तो भूमिका खेल्न सक्छन् भन्ने उदाहरण र प्रेरणा मिलेको छ,’ मुख्यमन्त्री लामाले भने, ‘आगामी दिनमा विपत् प्रतिकार्यका लागि चणिकलालजस्ता युवालाई प्रदेश सरकारले साथमा आवश्यक सहयोग र तालिमको व्यवस्था गर्छ ।’

प्रदेशका १३ वटै जिल्लामा विपत् व्यवस्थापन, उद्धार र राहतको कामलाई तीव्रता 
यसैबिच मुख्यमन्त्री लामाले विपत् व्यवस्थापन र बाढी, पहिरो प्रभावितको तत्कालीन उद्धार र राहत व्यवस्थापनका लागि प्रदेश सरकारले १३ वटै जिल्लामा आवश्यक जनशक्ति व्यवस्थापन गरेको बताएका छन्। विपत् प्रभावितको उपचारका लागि सबै जिल्लामा टोली परिचालन गरिएको जानकारी गराउँदै उनले नि:शुल्क उपचारको व्यवस्था मिलाइएको जानकारी दिए । यस्तै, तत्काल राहत र अस्थायी बसोवासका लागि आवश्यक प्रबन्ध मिलाउने काम भइरहेको मुख्यमन्त्री लामाको भनाइ छ ।

उनले संघीय सरकारसँगको समन्वय र स्थानीय सरकारसँगको सहकार्यमा पीडितलाई थप राहतको व्यवस्थापन गरिने पनि बताए । यसैगरी, बाढी र पहिरोका कारण क्षति पुगेका राजमार्ग र ग्रामीण सडकहरूलाई दसैँअघि नै सञ्चालन गर्ने गरी काम सुरु भइसकेको पनि जानकारी दिए ।