बाढीपछि सोलुखुम्बुको नाम्चेभन्दा माथिको आवातजावत ठप्प भएको छ। शुक्रबार थामेखोलामा आएको बाढीले खुम्बु पासाङल्हामु गाउँपालिका–३ फाक्दिङदेखि नाम्चे जाने पर्यटकीय पदमार्ग कटान गर्दा तल्लो क्षेत्रबाट सगरमाथा क्षेत्रबिचको आवातजावत ठप्प बनेको इलाका प्रहरी कार्यालय नाम्चेले जनाएको छ।
प्रहरी नायब निरीक्षक हेमबहादुर कटवालका अनुसार फाक्दिङदेखि नाम्चेबिचको दुई ठाउँमा १००/१०० मिटर जति पदमार्ग नदीको कटानमा परेको छ। जसका कारण लुक्लाबाट नाम्चे हुँदै थामे आवातजावत अवरुद्ध भएको छ। सगरमाथा पदमार्गमा पर्ने एक मात्र पदमार्ग भोटेकोशीले कटान गर्दा पदमार्ग अवरुद्ध भएको उनले बताए।
थामेखोला हुँदै आएको लेदोसहितको बाढी भोटेकोशी हुँदै दुधकोशी नदीमा मिसिएको छ। बाढीले खुम्बुको स्थानीय जलविद्युत् आयोजनाको ड्याम बगाउँदा सो क्षेत्रमा सञ्चारसेवासमेत ठप्प बनेको स्थानीय ल्हाक्पा नुरु शेर्पाले बताए।
उनले भने, ‘थामे यति वेला तनावग्रस्त अवस्थामा छ, यहाँ बत्ती छैन, फोन लाग्दैन, टिभी केही छैन सबै बाढीले बगायो, स्थानीयको ज्यानबाहेक सबै बाढीले बगायो, यहाँ असाध्यै गाह्रो छ। पर्यटकीय गाउँ सबै बगायो, देख्दै विरक्त लाग्दो छ।’ बाढीले खुम्बु पासाङल्हामु गाउँपालिका–५ थामेका २० घर तथा होटेल लज, एक स्वास्थ्यचौकी र विद्यालय बगाएको थियो। नेपाली सेना र प्रहरीले थामेबाट ९३ जनालाई उद्धार गरी आर्मी क्यामपछाडिको घरमा राखिएको छ भने ४२ जनालाई स्थानीय सामुदायिक भवनमा राखिएको प्रहरी नायब उपरीक्षक द्वारिकाप्रसाद घिमिरेले बताए ।
बाढीले तल्लो सोलुको तटीय क्षेत्रमा पनि असर गरेपछि दुधकोशी गाउँपालिका–६ का पाँच घरपरिवारलाई प्रहरीले अन्यत्र स्थानान्तरण गरेको छ। उक्त बाढी भोटेकोशी हुँदै दुधकोशीमा मिसिँदा सोलुखुम्बुको तल्लो क्षेत्रमा पर्ने माप्य–खुम्बु मितेरी पक्की पुलमा क्षति पुगेको छ।
बाढीले कोशीआसपासका क्षेत्र कटान गर्दा जिल्लाको खुम्बु पासाङल्हामु गाउँपालिका र माप्यदुधकोशी गाउँपालिका जोड्ने दुधकोशी नदीमाथिको पाकी मोटरेबल पुलमा सवारी सञ्चालन गर्न नमिल्ने गरी क्षति पुगेको जिल्ला प्रहरी कार्यालय सोलुखुम्बुले जनाएको छ। पुलमा क्षति पुगेसँगै सल्लेरीबाट खुम्बु सञ्चालन हुँदै आएको सीधा सडक सञ्जालसमेत टुटेको बताइएको छ।
यसैबिच, रक्षामन्त्री मानवीर राईसहितको टोली नेपाली सेनाको हेलिकोप्टरबाट पहिरोग्रस्त थामे गाउँ पुगेको छ। शुक्रबार दिउँसो थामेखोलामा आएको बाढीले बगाएको थामे गाउँको स्थलगत निरीक्षणका लागि काठमाडौंबाट रक्षामन्त्री राईसहित विपत् व्यवस्थापन समितिको टोली थामे पुगेको हो। निरीक्षण टोलीमा सोलुखुम्बुका प्रमुख जिल्ला अधिकारी, प्रहरी नायब उपरीक्षक, नेपाली सेनाका कर्णेल, जिल्लाका सांसदलगायत रहेका छन्।
