रुपन्देहीको बुटवलमा गुणस्तरहीन दुध बिक्री हुने गरेको पाइएको छ । व्यवसायीले दुधमा अत्यधिक मात्रामा पानी मिसाएर बेच्ने गरेको तथ्य फेला परेको छ । बुटवल उपमहानगरपालिकाले खाद्य प्रविधि तथा गुण नियन्त्रण कार्यालयको प्राविधिक टोली र उपभोक्ता हित संरक्षण मञ्चको उपस्थितिमा गरेको अनुगमनमा अत्यधिक मात्रामा पानी मिसाएर वा फ्याट झिकेर दुध बेच्ने गरेको पाइएको हो ।
अनुगमन टोलीले बुटवलमा दुध सप्लायर्स गर्ने उद्योग, दुध वितरण गर्ने सहकारी र डेरीका १० वटा नमुना संकलन गरी खाद्य प्रविधि तथा गुण नियन्त्रण कार्यालय भैरहवाको प्रयोगशालामा परीक्षण गरेको थियो । १० वटै नमुना प्रयोगशालामा परीक्षण गर्दा नतिजा फेल आएको खाद्य प्रविधि तथा गुण नियन्त्रण कार्यालय भैरहवाका खाद्य निरीक्षक दीपककुमार यादवले बताए । जाँच गरेका नमुनामा दुधबाट फ्याटको मात्रा झिकिएको वा पानी मिसाएर बेच्ने गरेको पाइएको छ ।
सरकारले भैँसीको दुधमा न्यूनतम फ्याट ५ प्रतिशत, एसएनएफ ८, गाईको दुधमा ३.५ प्रतिशत फ्याट, एसएनएफ ७ र मिक्स दुधमा ३.५ प्रतिशत फ्याट एसएनएफको मात्रा ८ प्रतिशत तोकेको छ । तर, बुटवलको बजारमा १.८ प्रतिशत फ्याट भएको दुध बिक्री–वितरण हुने गरेको पाइएको छ । दुधको गुणस्तरमा कमी आएको गुनासो आउन थालेपछि बुटवल उपमहानगरपालिकाले पछिल्लो समय डेरीको अनुगमनलाई तीव्रता दिएको छ । बुटवलमा बिक्री–वितरण हुने दुधको अवस्थाका विषयमा पहिले डेरी व्यवसायलाई सचेत गराउँदै अनुगमन गर्ने र मापदण्डभन्दा विपरीत पाइए तत्काल कारबाही गर्ने उपमहानगरपालिकाका उपप्रमुख सावित्रादेवी अर्यालले जानकारी दिइन् । व्यवसायी र उपभोक्तालाई सचेत गराउन अहिले माइकिङ गरिएको र अनुगमनका क्रममा मापदण्डभन्दा विपरीत दुध बेचेको पाइए तत्काल कारबाही गरिने उनले बताइन् । उपमहानगरपालिकाले मापदण्डभन्दा विपरीत दुध बेच्नेलाई १० हजार रुपैयाँसम्म जरिवाना लिन सक्ने व्यवस्था रहेको अर्यालले जानकारी दिइन् ।
