क्यानडाका लागि राजदूत पौड्यालले बुझाए ओहोदाको प्रमाणपत्र

बिहिबार, २० बैशाख, २०८१
डिजिटल संस्करण

क्यानडाका लागि नेपाली राजदूत भरतराज पौड्यालले गभर्नर जनरल तथा क्यानडाका कमान्डर इन चिफ मेरी जे सिमोनसमक्ष बुधबार ओहोदाको प्रमाणपत्र पेस गरेका छन् । रिडेउ हलमा आयोजित विशेष समारोहमा पौड्यालले राष्ट्रपति रामचन्द्र पौडेल र प्रधानमन्त्री पुष्पकमल दाहाल प्रचण्डको सन्देश पनि सुनाएका छन् । 

प्रमाणपत्र पेस गरेपछि गभर्नर जनरल सिमोनसँगको शिष्टाचार कुराकानीमा राजदूत पौड्यालले दुई देशको मैत्रीपूर्ण सम्बन्धप्रति नेपाल सरकारको प्रसन्नता व्यक्त गरेका थिए । उनले लोकतन्त्रको सुदृढीकरण, आर्थिक विकासका प्रयास अघि बढाउने नेपालको प्राथमिकता सुनाएका थिए ।

राजदूत पौड्यालले सन् २०३० सम्म दिगो विकास लक्ष्य हासिल गर्न तथा दुई वर्षपछि अति कम विकसित मुलुकबाट विकासशीलको हैसियतमा सहज र दिगो स्तरोन्नतिका लागि नेपालले गरेका प्रयासबारे पनि जानकारी गराएको नेपाली राजदूतावासले जनाएको छ । यसैगरी राजदूत पौड्यालले नेपाललाई आवश्यक परेको समयमा क्यानडाले पुर्‍याउँदै आएको सहयोगको सराहना गरेका थिए । राजदूत पौड्यालले क्यानडा सरकार, निजी क्षेत्रलगायतसँग द्विपक्षीय व्यापार, पर्यटन, लगानी, प्रविधि हस्तान्तरण, जनस्तरको सम्बन्ध अभिवृद्धि तथा पारस्परिक लाभदायी आर्थिक साझेदारी वृद्धि गर्न निकटबाट सहकार्य गर्ने प्रतिबद्धता पनि सुनाएका थिए ।

गभर्नर जनरल सिमोनले नेपालसँगको सम्बन्ध थप सुदृढ गर्न क्यानडा सरकारको पूर्ण सहयोगको वचन दिएकी छिन् । नेपालका पूर्वपरराष्ट्रसचिवसमेत रहेका राजदूत पौड्यालको सफल कार्यकालका लागि उनले शुभकामना व्यक्त गरेको नेपाली राजदूतावासले विज्ञप्तिमा जनाएको छ । उक्त समारोहमा क्यानडा सरकारका उच्च अधिकारी, नेपाली राजदूतावासका कर्मचारी तथा राजदूत पौड्यालको परिवारका सदस्य उपस्थित थिए । 
 

सुझावित समाचार