ओपनर टोनी उराको अर्धशतकप्रेरित पपुवा न्युगिनी (पिएनजी)ले त्रिकोणात्मक अन्तर्राष्ट्रिय टी–२० शृंखलाको फाइनलमा नेपाललाई एक सय ७२ रनको लक्ष्य प्रस्तुत गरेको छ ।
हङकङको मोङकोकस्थित मिसन रोड क्रिकेट मैदानमा पिएनजीले टस हारेर ब्याटिङ गरेको थियो । निर्धारित २० ओभरमा आठ विकेट गुमाउँदै पिएनजीले एक सय ७१ रन बनायो । कमजोर सुरुवात गरेको पिएनजीलाई ओपनर उराले प्रतिस्पर्धात्मक लक्ष्यतर्फ पुर्याएका थिए । उराले ३७ बलमा पाँच चौका र चार छक्कासहित ६१ रन बनाए । आलेई नाओले आक्रामक ब्याटिङ गर्दै १० बलमा एक चौका र तीन छक्कासहित ३० रन बनाए ।
नेपालका कुशल भुर्तेल र आकाश चन्दले सर्वाधिक तीन–तीन विकेट लिए । चार ओभर बलिङ गरेका कुशलले ४ ओभरमा २४ रन खर्चिए । युवा बलर आकाश चन्दले चार ओभरमा ४१ रन खर्चिएका हुन् । करण केसी र गुल्सन झाले समान एक विकेट लिए।
पिएनजीका अर्का ओपनर सेसे बाउलाई करणले आकाश चन्दबाट डक गराएका हुन् । आकाशले विकेटकिपर विनोद भण्डारीबाट कप्तान असाद भालालाई दुई रन बनाउँदा क्याच गराए । आकाशले दोस्रो विकेटको रूपमा करणबाट लेगा सिआकालाई दुई रनमा आउट गराउँदा ३.१ ओभरमा पिएनजी २०–३ को अवस्थामा थियो । गुल्सनले नाै बलमा दुई चौका र एक छक्का हिर्काएका हिरिहिरीलाई लोकेस बमबाट क्याच गराएका हुन् ।
पाँचौँ विकेटका लागि टोनी उरा र चाद सोपरबीच ३९ बलमा सर्वाधिक ४८ रनको साझेदारी भएको थियो । चादले १३, हिला भारेले १८, किप्लिन डोरिगाले १४ रन बनाएका आउट भएका हुन् ।
यसअघि नेपाल दुई खेलबाट तीन अंक र पिएनजी दुई अंकसहित शीर्ष दुईमा रहेर फाइनल खेलेका छन् । दुई खेलमा एक अंक जोडेको हङकङ तेस्रो हुँदा बाहिरियो । नेपालले पहिलो खेलमा हङकङसँग वर्षा हुँदा अंक बाँडेको थियो । दोस्रो खेलमा पिएनजीलाई ८५ रनले हराएको हो ।
