३३ जना सदस्यबाट सुरु भएकाे सहकारीमा अहिले करिब १४ हजार सेयर सदस्य
देशभर केही सहकारीका गलत हर्कतहरू बाहिर आइरहेका वेला गुल्मीका केही सहकारी संस्थाहरूले भने आफूलाई अब्बल बनाउँदै लगेका छन् । जिल्लाका अब्बलमध्येको मैत्री बहुउदेश्यीय सहकारी संस्थाले स्थापनाको २१ वर्षमा करिब १४ हजार सेयर सदस्य र १० करोड ३४ लाख ६३ हजार तीन सय सेयर पुँजी निर्माण गरेको छ । कुल ७५ करोड ८९ लाख ४१ हजार आठ सय ७४ रुपैयाँ कुल पुँजी निर्माण गरेको छ ।
‘भनेको मान्ने’ व्यक्तिहरूको सहभागितामा ग्रामीण भेगमा वित्तीय परिपूर्ति र सदस्यको जीवनस्तर उठाउने उद्देश्यले ०५८ सालमा सहकारी स्थापना गरिएको थियो । तत्कालीन पाँच गाविसका ३३ जना सेयर सदस्यले १३ हजार दुई सय रुपैयाँ सेयर पुँजी संकलन गरेर सहकारी अगाडि बढाएका थिए । संस्थाले २२औँ साधारणसभामा प्रस्तुत गरेको प्रगति प्रतिवेदनअनुसार अहिले सहकारीको सेयर सदस्य १३ हजार नौ सय ७२ र सेयरपुँजी करिब साढे १० करोड रहेको छ ।
सहकारीले क्षेत्र विस्तार र लगानी व्यापक बनाउँदै लगेको सहकारीका कार्यकारी निर्देशक अर्जुन आचार्यले जानकारी दिए । सहकारीले गुल्मीसहित पाल्पा, अर्घाखाँची, रुपन्देही, नवलपरासी पश्चिम र कपिलवस्तु जिल्लामा कार्यक्षेत्र विस्तार गरेको छ ।
गुल्मीमा प्रधान कार्यालयसहित यस सहकारीले बलेटक्सार, खैरेनी, आँपचौर, इस्मा, धुर्कोट र पुर्कोटमा सेवा केन्द्र विस्तार गरेको छ । त्यस्तै, कपिलवस्तुको तौलिहवा र रुपन्देहीको बुटवलमा समेत सेवाकेन्द्र विस्तार गरिएको निर्देशक आचार्यले बताए ।
संस्थाले एक करोड ७९ लाखको आफ्नै भवन निर्माण गरेको छ । २५ पुरुष र २० जना महिला गरेर ४५ जना कर्मचारीमार्फत कार्यसम्पादन गरिरहेको छ । सहकारीले बचत संकलन तथा ऋण प्रवाह, कृषि उपजजन्य सुपथ पसल सञ्चालन, वित्तीय साक्षरता, नेतृत्व विकासलगायतका काम पनि गरिरहेको आचार्यले बताए ।
विगतमा देखिएको कोभिड– १९ को प्रभाव, वर्तमान समयमा सहकारीप्रति मानिसको फरक धारणा एवं नेपालका युवा विदेश जाने दर बढ्नु, उद्योगधन्दा, कलकारखाना, व्यवसाय बन्द हुने क्रम बढ्दै जाँदा र अहिले समग्र अर्थतन्त्रमा देखिएको आर्थिक मन्दिका बीचमा यस सहकारीले जनविश्वास बढाउँदै लगेको अध्यक्ष गोपालबहादुर सुनारले बताए ।
