बाबर आजमको नेतृत्वमा रहेको पाकिस्तानी क्रिकेट टोली बुधबार भारत आइपुग्यो । पाकिस्तानी टोलीको स्वागतका लागि हैदराबादस्थित राजीव गान्धी अन्तर्राष्ट्रिय रंगशालामा क्रिकेट समर्थक तथा सुरक्षा अधिकारीहरूको भिड थियो । ५ अक्टोबरबाट भारतमा सुरु हुने एकदिवसीय क्रिकेट खेल्नका लागि दुबई हुँदै पाकिस्तानी टिम हैदराबाद आएको हो ।
यसअघि २०१६ मा टी–२० विश्वकप खेल्नका लागि पाकिस्तानी टिम भारत आएको थियो । एकदिवसीय विश्वकपको उद्घाटन खेलमा अहमदाबादस्थित नरेन्द्र मोदी रंगशालामा इंग्ल्यान्ड र न्युजिल्यान्ड भिड्नेछन् । पाकिस्तानले आफ्नो पहिलो खेल ६ अक्टोबरमा नेदरल्यान्ड्सविरुद्ध खेल्नेछ । त्यस्तै, दोस्रो खेल हैदराबादमा श्रीलंकाविरुद्ध खेल्नेछ । ४६ दिनसम्म चल्ने एकदिवसीय विश्वकपमा ४८ खेल हुनेछन् । १२ नोभेम्बरसम्म लिग चरणका ४५ खेल चल्नेछन् । त्यसपछि १५ र १६ नोभेम्बरमा सेमिफाइनल तथा १९ नोभेम्बरमा अहमदाबादमा फाइनल खेल हुनेछ ।
हाम्रो लक्ष्य च्याम्पियन बन्ने हो : बाबर
पाकिस्तानका कप्तान बाबर आजमले विश्वकप जित्ने लक्ष्य राखेको बताएका छन् । ‘हामी विश्वकप जित्न चाहन्छौँ । विश्वकपअघि हामीले धेरै समय क्याम्पमा बिताउन पाएनौँ, किनकि हामी लामो समयदेखि निरन्तर खेलिरहेका छौँ । त्यसैले हामीले खेलाडीलाई ब्रेक दियौँ । ताकि, उनीहरू रिफ्रेस हुन सकून् र जित्ने भोकसहित आऊन् ।
जब तपाईंसँग त्यस्तो भोक हुन्छ, तब उत्कृष्ट खेल्नुहुन्छ,’ उनले भने । उनले एसिया कपमा गरेका गल्तीलाई विश्वकपमा नदोहोर्याउने बताए । ‘एसिया कपका अन्तिम दुई खेलअघि हामीले साँच्चै राम्रो गरिरहेका थियौँ । एसिया कप फरक प्रतियोगिता थियो र विश्वकप पूरै फरक छ । हामीले त्यहाँ गरेका गल्तीबाट सिकेका छौँ । त्यसलाई दोहोरिन दिनेछैनौँ,’ उनले भने । एसिया कपको सुपर सिक्समा भारत र श्रीलंकासँग पराजित भएपछि पाकिस्तान फाइनल पुग्न असफल भएको थियो ।
