केन्द्रीय कार्यसमिति बैठकमा गुटबन्दी छताछुल्ल भएपछि नेताहरू एकताको सन्देश दिनुपर्ने दबाबमा, भ्रष्टाचारविरुद्ध कठोर हुनुपर्ने इतर समूहको माग
११ महिनापछि बसेको, प्रत्यक्ष प्रसारण भएको र समूहगत आरोप–प्रत्यारोपले चर्चामा आएको कांग्रेस केन्द्रीय कार्यसमिति बैठक निर्णय अनुमोदन गर्न बुधबार बस्दै छ । केन्द्रीय सदस्यहरूले धारणा राख्ने क्रम सोमबार सकिएपछि मंगलबार बैठक स्थगन गरेर शीर्ष नेता निर्णयको प्रस्ताव बनाउने गृहकार्यमा छन् ।
देशको ठूलो राजनीतिक शक्ति भएकाले कांग्रेस केन्द्रीय समितिको बैठक राष्ट्रिय राजनीतिका लागि समेत महत्वपूर्ण छ । सोहीकारण कांग्रेस शीर्ष नेताहरू पार्टीको आन्तरिक जीवनमा ऊर्जा थप्ने र राष्ट्रिय राजनीतिलाई आफ्नो दिशामा अगाडि बढाउने निर्णय लिनुपर्ने दबाबमा छन् । बैठकमा पार्टीभित्रको गुटबन्दी छताछुल्ल भएपछि कांग्रेस नेताहरू एकताको सन्देश दिनुपर्ने अवस्थामा छन् । बैठकका निर्णयको मस्यौदा बनाउन मंगलबार कांग्रेस पदाधिकारीको बैठक बसेको छ । सभापति शेरबहादुर देउवाले धुम्बाराहीस्थित निवासमा पदाधिकारी बैठक बोलाएका थिए । सभापति देउवा, महामन्त्रीद्वय गगन थापा र विश्वप्रकाश शर्मासहितका पदाधिकारी सहभागी बैठकले ठोस निर्णय भने गरेन । नेता–कार्यकर्ता बैठकबाट तय हुने नयाँ बाटोको पर्खाइमा छन् ।
कार्यतालिका परिमार्जन हुने, खाणको विषयमा फरक मत आउन सक्ने
बैठकले ठोस निर्णय गरिसकेको छैन । केन्द्रीय कार्यसमितिमा पेश गरिने निर्णयको अन्तिम टुंगो लगाउन बुधबार सभापति र महामन्त्रीले थप गृहकार्य गर्ने भएका छन् । सहमहामन्त्री बद्री पाण्डेका अनुसार पदाधिकारी बैठकले एजेन्डामा आधारित सुझावलाई समेट्ने तथा समसामयिक विषय निर्णयमा समेट्ने समझदारी गरेको छ । ‘पदाधिकारी बैठकमा उठेका विषयलाई समेट्नेबारे छलफल भयो । साथै, समसामयिक विषयमा कांग्रेसका धारणाअन्तर्गत राजनीतिक, आर्थिक तथा जनजीविका र आमचासोका विषयलाई पनि निर्णयमा समेटिनेछन् । कार्यतालिका परिमार्जनसहित परित गरिनेछ,’ उनले नयाँ पत्रिकासँग भने ।
बैठकले महासमिति बैठकबाट नै नीति अधिवेशन गर्ने टुंगो लगाएको छ । सहमहामन्त्री फर्मुल्लाह मन्सुरले समसामयिक विषय समेटेर निर्णय सार्वजनिक गरिने बताए । ‘बैठकमा प्रस्तुत १० एजेन्डामा केन्द्रित भएर तथा कांग्रेसले स्पष्ट पार्नुपर्ने धारणा समेट्नेबारेका विषयमा छलफल भएको छ । मोटामोटी निर्णयका विषय टुंगो लागेको छ । बुधबार सभापति र महामन्त्रीबाट अन्तिम टुंगो लगाएर बैठकमा प्रस्तुत गरिनेछ ।
एक पदाधिकारीका अनुसार खाणको विषयमा भने पदाधिकारीको मत बाझिएको छ । संस्थापननिकट पदाधिकारी संस्थागत रूपमा बोल्नुपर्नेमा छन् भने अन्य पदाधिकारी पार्टीको धारणा स्पष्ट हुनुपर्नेमा छन् । स्रोतका अनुसार समसामयिक विषयअन्तर्गत खाणको नाम उल्लेख नगरी संस्थागत धारणा आउने सम्भावना छ । यसरी धारणा आउने भएपछि केही पदाधिकारीले फरम मत राख्ने तयारी गरेका छन् । निर्णयबारे अन्तिम टुंगो लगाउन बुधबार बिहान ११ बजे बैठक बस्नेछ । दिउँसो ४ बजे केन्द्रीय समिति बैठक बसेर निर्णय सार्वजनिक गरिनेछ ।
बैठकमा आक्रामक नेता चियापानमा सौहार्दपूर्ण
निर्णयको पूर्वसन्ध्यामा पूर्वमहामन्त्री डा. शशांक कोइरालाले लैनचौरमा आयोजना गरेको चियापानमा नेताहरू एकसाथ भेटिए । केन्द्रीय समितिमा धारणा राख्ने क्रममा एक–अर्काविरुद्ध आक्रामक देखिएका नेताहरू चियापानमा भने सौहार्दपूर्ण वातावरणमा प्रस्तुत भए । चियापानमा डा. कोइरालाले बैठकबाट कांग्रेस एकताबद्ध हुने वातावरण तयार भएको र नयाँ बाटो तय हुने गरी निर्णय आउनुपर्ने बताए । ‘कांग्रेस एक भएको खण्डमा धेरै ठूलो परिवर्तन ल्याउन सक्छ । अबको दिनमा हामी एकताबद्ध भएर हिँड्नुपर्छ । कांग्रेसको विकल्प कांग्रेस नै हो, अरू छैनन् । भविष्य कांग्रेससँगै छ, हामी एक भयौँ भने कसैले हराउन सक्दैन,’ कोइरालाले भने ।
मंगलबार नै ‘राजनीतिक चुनौतीहरू र कांग्रेसको दायित्व विषयक विचार गोष्ठी’मा सहभागी कांग्रेस नेताहरूले रूपान्तरण र पार्टी एकतामा जोड दिएका थिए । इतर समूहका नेता डा. शेखर कोइरालाले भने, ‘विधिसम्मत हिँड्यौँ भने पनि हाम्रा धेरै चुनौती समाप्त हुनेछन् । केन्द्रीय समिति बैठकपछिको कांग्रेसले भ्रष्टाचारमा शून्य सहनशीलतालाई लिएर जानुपर्छ । यसरी जान सकेनौँ भने समस्यामा पर्छौँ ।’
चियापानमै पूर्वउपसभापति विमलेन्द्र निधिले पार्टीमा सभापति भर्सेस महामन्त्री भन्ने नरहेको दाबी गरे । ‘पार्टीमा सभापति भर्सेस महामन्त्री भन्ने कुरा केही पनि छैन । केन्द्रीय समितिमा सबैले छलफल गर्नुभएको छ, एकताबद्ध भएर जनताको लोकतन्त्रको पक्षमा काम गर्नेछ, जनताको काम गर्ने एउटा आवाज लिएर निस्किन्छ,’ निधिले भने । कांग्रेस मुख्य सचेतक रमेश लेखकले कांग्रेस नयाँ ध्रुवीकरणको चरणमा प्रवेश गरेको बताए । नेता गुरुराज घिमिरेले नेता बालकृष्ण खाणको विषयमा पनि पार्टी स्पष्ट हुनुपर्ने बताए ।
