गृह मन्त्रालयका अधिकारीले अमेरिकाले भिसाको आवेदनमै नेपालीलाई उच्च शुल्क लिने गरेकोमा त्यसको औचित्यमाथि प्रश्न गरेका छन् । शुक्रबार गृह मन्त्रालयमा भिसा पारस्पारिकताका विषयमा काठमाडौंस्थित अमेरिकी दूतावासका अधिकारीसँग यस्तो प्रश्न राखेका हुन् ।
अमेरिकाको भिसा आवेदनकै लागि एक सय ६० अमेरिकी डलर बुझाउनुपर्ने हुन्छ । आवेदनकै क्रममा यस्तो चर्काे शुल्क सामान्यतया अन्य देशले लिँदैनन् । भिसा अस्वीकृत हुँदा पनि सो शुल्क फिर्ता हुँदैन ।
गृहका अधिकारीले यस्तो प्रणाली संशोधन गर्न आग्रह गरेका हुन् । छलफलमा सहभागी अमेरिकी दूतावसका अधिकारीले अमेरिकाबाट हुने उच्चस्तरीय भ्रमणमा यो विषयलाई एजेन्डाका रूपमा उठाउन आग्रह गरेको गृहका कर्मचारीले बताए ।
नेपाल र अमेरिकाबीच २०१९ देखि चार किसिमको भिसामा पारस्पारिकता कायम गरिएको छ । पर्यटक, विद्यार्थी, कामदार र प्रेस भिसामा पारस्पारिकता कायम गरिएको हो । जसअनुसार पर्यटक तथा विद्यार्थी भिसा लिनेले एकैपटक पाँच वर्षको मल्टिपल भिसा पाउँछन् । कामदार भिसाका लागि एक सय ९० तथा अन्य भिसाका लागि समान एक सय ६० डलर भिसाशुल्क कायम गरिएको छ ।
विद्यार्थी भिसामा अमेरिकाले एक सय ६० डलर लिनेमा नेपालले भने अमेरिकी विद्यार्थीलाई तीन सय ६० डलर लिने गरेको छ । यस्तो शुल्क एक सय ६० मा घटाउन शुक्रबारको बैठकमा अमेरिकी दूतावासका अधिकारीले आग्रह गरेका छन् ।
पारस्पारिकता कायम भएलगत्तै अमेरिकाले भिसा शुल्क घटाए पनि नेपालले घटाउन सकेको छैन । नेपालले पनि अमेरिकी विद्यार्थीका लागि यस्तो शुल्क घटाउन प्रक्रिया अघि बढाएको गृह मन्त्रालयका प्रवक्ता जितेन्द्र बस्नेतले बताए । ‘भिसा पारस्पारिकता कायम भए पनि अमेरिकाले विद्यार्थी भिसाको शुल्क घटाए पनि नेपालले नघटाएकोमा उहाँहरूको चासो थियो,’ बस्नेत भन्छन्, ‘यसमा हामीले पनि शुल्क घटाउने तयारी थालेका छौँ ।’
