गण्डकी प्रदेश सभाका ज्येष्ठ सदस्य मित्रलाल बस्यालले आज पद तथा गोपनीयताको शपथ लिएका छन् ।
प्रदेश प्रमुख पृथ्वीमान गुरुङले प्रदेश प्रमुखको कार्यालयमा आयोजित कार्यक्रममा बस्याललाई ज्येष्ठ सदस्यको शपथ गराए ।
एमालेका बस्याल पर्वत १ (२) बाट निर्वाचित भएका हुन् । शपथ कार्यक्रममा गण्डकी प्रदेशका मुख्यमन्त्री कृष्णचन्द्र नेपाली पोखरेल, प्रदेश सरकारका मन्त्रीहरू, सचिवहरू, मन्त्रालयका कर्मचारीलगायत उपस्थित थिए ।
संविधानको धारा १८२ (५) र प्रदेश सभा निर्वाचन ऐन २०७४ को दफा ७५ (१) बमोजिम ज्येष्ठ सदस्यलाई प्रदेश प्रमुखले पद तथा गोपनीयताको शपथ गराएका कानुनी व्यवस्था रहेको छ ।
प्रदेश सभाका ६० सदस्यमध्ये ज्येष्ठ सदस्य रहेका बस्यालको जन्म ५ भदौ ०१४ सालमा भएको हो । प्रदेश प्रमुखबाट शपथ लिएपछि उनले अन्य ५९ सदस्यलाई भोलि प्रदेश सभा सचिवालयमा पद तथा गोपनीयताको शपथ गराउनेछन् ।
प्रदेश सभा सचिवालयका सचिव हरिराज पोखरेलले शपथको सम्पूर्ण तयारी भइसकेको जानकारी दिए । सचिवालयका अभिलेख शाखाका शाखा अधिकृत झनकराज अधिकारीका अनुसार कागजी प्रक्रिया पूरा गर्न प्रदेश सभा सदयहरूलाई शपथ लिनुभन्दा दुई घन्टाअगाडि सचिवालयमा सम्पर्क गर्न सबैलाई सूचित गरिसकिएको छ ।
प्रदेश सभा सदस्यहरूले भोलि निर्वाचन आयोगले दिएको निर्वाचित भएको प्रमाणपत्रको फोटोकपी, नागरिकता प्रमाणपत्रको फोटोकपी र दुई प्रति फोटो लिएर आउनुपर्छ ।
