- वि.सं २o७९ कार्तिक १७ बिहीबार
राष्ट्रिय स्वतन्त्र पार्टीले आफ्नो व्यक्तिगत, गुटगत र दलगत स्वार्थपूर्तिका लागि लोकतन्त्र र विधिलाई निमोठिएको जनाएको छ। बिहीबार सार्वजनिक पार्टीको वाचापत्रमा गत पाँच वर्षको समीक्षा गर्दै सो पार्टीले पछिल्लो पाँच वर्षमा दलहरूको प्रवृत्ति छर्लंग भएको बताएको छ।
पार्टीभित्रको आन्तरिक किचलो र गुटगत तानातानका कारण संविधानले दिँदै नदिएको अधिकार प्रयोग गरी दुईपटक संसद् विघटन गरिएको रवि लामिछाने नेतृत्वको पार्टीको चुनावी वाचापत्रमा उल्लेख गरिएको छ।
‘पार्टीभित्रको आन्तरिक किचलो र गुटगत तानातानको सिकार संसद्लाई बनाइयो। संविधानले दिँदै नदिएको अधिकार प्रयोग गरेर दुई–दुईपल्ट संसद्को हत्या गर्ने प्रयास गरियो । आफ्नो व्यक्तिगत, गुटगत र दलगत स्वार्थपूर्तिका लागि मुलुकको जतिसुकै अहित गर्न तथा लोकतन्त्र र विधिलाई निमोठ्न तयार हुने दलहरूको प्रवृत्ति पछिल्लो पाँच वर्षमा झन् छर्लंग भयो,’ वाचापत्रमा भनिएको छ।
