इन्धन लिन भारत हिँडेका ट्यांकरलाई अवरोध

इन्डियन आयल कर्पोरेसन (आइओसी)को बरौनी रिफाइनरीमा पेट्रोल लिन वीरगन्ज भन्सार कार्यालयपरिसर पुगेका ट्यांकरलाई पेट्रोलियम ढुवानी व्यवसायीले अवरोध गरेका छन् । अत्यावश्यक वस्तु तथा सेवा अबरुद्ध गर्न नपाईने कानूनी व्यवस्था बिपरित आयल निगमको मधेस प्रादेशिक कार्यालय अमलेखगन्ज र वीरगन्जस्थित शाखा कार्यालयका लागि पेट्रोल लिन जाँदै गरेका ट्यांकरलाई पेट्रोलियम ट्यांकर ढुवानी व्यवसायी महासंघका वरिष्ठ उपाध्यक्ष मनोज दासको नेतृत्वमा पुगेको टोलीले रोकेको हो ।

करिब एक दर्जन व्यवसायीले वीरगन्ज महानगरपालिका–२५, श्रीसियामा रहेको एकीकृत जाँचचौकी (आइसिपी) अगाडि भन्सार जाँचपासका लागि लाइनमा रहेको ट्यांकरलाई उनीहरूले दिउँसो तीनदेखि चार बजेसम्म अवरोध गरेका थिए । त्यसपछि कुनै पनि ट्यांकर तेल लिनका लागि भारत नगएको भन्सार कार्यालयले जनाएको छ । उनीहरूले अवरोध गर्नुअघि बिहान करिब २५ ट्यांकर पेट्रोल लिनका लागि आइओसीको बरौनी रिफाइनरी गएका थिए । एक वर्षदेखि ढुवानी भाडादर वृद्धिको माग राखे पनि सुनुवाइ नभएकाले टं्याकर रोक्न थालिएको महासंघका वरिष्ठ उपाध्यक्ष दासले बताए ।  

पेट्रोलियम ढुवानीमा अवरोध कायमै, सरकार मूकदर्शक 
ढुवानी भाडादर वृद्धिको माग राख्दै पेट्रोलियम ट्यांकर ढुवानी व्यवसायी महासंघले आइतबार आयल निगमको कुनै पनि डिपोबाट तेल खरिद आदेशपत्र (पिडिओ) लिएका छैनन् । पिडिओ नलिएका कारण न्यून संख्यामा मात्रै तेल लिनका लागि ट्यांकरहरू भारत गएका छन् ।

व्यवसायीले कानुनविपरीत पेट्रोलियम क्षेत्रको आपूर्तिमा नै असर पर्ने गरी ढुवानीमा अवरोध गरे पनि सरकारले कारबाही गर्न सकेको छैन । बरु, वार्ताबाट समाधान खोज्ने भन्दै व्यवसायीसँग छलफल गरिरहेको छ । ढुवानी व्यवसायीहरू भने एक वर्षदेखिको माग पूरा गराउन निर्णायक आन्दोलन गर्नुपरेको भन्दै अहिले देशभर इन्धन आपूर्ति रोक्ने गरी अघि बढेका छन् । 

महासंघले भाडादर वृद्धिको माग पूरा गर्न दबाब दिने उद्देश्यले २४ भदौबाट भारत जाने ट्यांकरका लागि पिडिओ लिन छाडेको छ । जसकारण आइतबार निगमको विराटनगर र झापा डिपोबाट कुनै पनि ट्यांकर तेल लिनका लागि भारत नगएको निगमले जनाएको छ । विराटनगर डिपोले आइओसीको बरौनी रिफाइनरी र झापास्थित निगमको शाखा कार्यालयले आइओसीको पश्चिम बंगालस्थित सिलिगुडी डिपोबाट ट्यांकरमा तेल ओसार्ने गरेका छन् ।

निगमको दोस्रो ठूलो डिपोका रूपमा परिचित मधेस प्रादेशिक कार्यालय, अमलेखगन्जबाट भने आइतबार १० ट्यांकरले पेट्रोल ल्याउनका लागि पिडिओ लिएका छन् । यहाँबाट सामान्य अवस्थामा दैनिक २०–२२ ट्यांकर पेट्रोल लिन आइओसीको बरौनी रिफाइनरी जाने गरेका थिए ।

भैरहवास्थित लुम्बिनी प्रादेशिक कार्यालय, नेपालगन्जथित इन्धन डिपो र धनगढीस्थित सुदूरपश्चिम प्रादेशिक कार्यालयबाट पनि आइतबार कुनै पनि ट्यांकर तेल लिनका लागि भारत नगएको एक कर्मचारीले बताए । 

तेल लिन ट्यांकरहरू भारत नजाँदा आपूर्ति प्रणालीमा असर पर्ने देखिएको छ । यद्यपि, अहिले देशभर निगमसँग ४० हजार किलोलिटरभन्दा बढी इन्धन मौज्दात रहेको र यसले एक सातासम्मको माग धान्ने अवस्था रहेको निगमको भनाइ छ । व्यवसायीलाई सहमत गराई ढुवानी अवरोध खुलाउन आइतबार निगममा छलफल भए पनि कुनै निष्कर्ष ननिस्किएको स्रोतको भनाइ छ ।