दलहरूले अडान नछाडेपछि गठबन्धनमा टुंगिएन सिट बाँडफाँड, आज निर्णायक बैठक 

सत्तारूढ पाँचदलीय गठबन्धनमा दलहरूले आ–आफ्नो अडान नछाडेपछि बुधबार पनि प्रतिनिधिसभा र प्रदेश सभा निर्वाचनका लागि सिट संख्या बाँडफाँड टुंगो लाग्न सकेको छैन । प्रधानमन्त्रीनिवास बालुवाटारमा भएको गठबन्धनका शीर्ष नेता र कांग्रेस नेता कृष्ण सिटौला नेतृत्वको सिट बाँडफाँडसम्बन्धी कार्यदलको संयुक्त बैठकमा दलहरूले यसअघिकै दाबी नछाडेपछि सिट भागबन्डा नमिलेको हो । 

माओवादीबाट कार्यदल सदस्य रहेका नेता वर्षमान पुनले छलफल सकारात्मक रूपमा अगाडि बढेको र बिहीबारको बैठकबाट टुंगो लाग्ने दाबी गरे । ‘बैठक सकारात्मक रूपमा अगाडि बढेको छ । शीर्ष तहमा संख्याबारे छलफल भएको छ ।

सबैले लचक भएर आ–आफ्नो दाबीलाई छाडेर सहमतिमा पुग्ने समझदारी बनेको छ,’ उनले भने, ‘बिहीबार बिहान ११ बजेबाट बालुवाटारमै बैठक बस्दै छ । खाना–खाजा त्यहीँ खाएर पनि हामी टुंगोमा पुर्‍याउने तयारीमा छौँ । उक्त बैठकबाट संघ र प्रदेशको सिट संख्या र मोटामोटी क्षेत्रको विषयसमेत एकसाथ टुंगो लगाउने तयारी छ । शीर्ष तहबाट टुंगो लागेपछि कार्यदलले बाँकी काम गर्नेछ ।’ 

बुधबार छलफलका क्रममा कार्यदल र शीर्ष नेताहरूको छुट्टाछुट्टै बैठकसमेत बसेको थियो । कांग्रेसबाट कार्यदल सदस्य तथा सरकारका प्रवक्ता ज्ञानेन्द्र कार्कीले सिट बाँडफाँडको विषय सहमतिनजिक पुगेको, तर निष्कर्षमा नपुगेको जानकारी दिएका थिए । उनले पनि आगामी बैठकबाट निष्कर्षमा पुग्ने दाबी गरे । ‘हामी सहमतिनजिक पुगेका छौँ । अबको बैठकले ठोस निष्कर्ष निकाल्नेछ,’ उनले भने, ‘छलफल भएका मोडालिटीअनुसार सिट बाँडफाँड हुन्छ । कुन पार्टीले कति छोड्ने भन्नेबारे न्यायोचित ढंगले निर्णय गरिनेछ ।’

सोमबार गठबन्धनमा बुधबारभित्र संख्या र २० भदौभित्र प्रदेश र प्रतिनिधिसभा निर्वाचन क्षेत्र बाँडफाँडको टुंगो लगाउने समझदारी बनेको थियो । त्यसअघि ९ भदौमा शीर्ष नेता र कार्यदल सदस्यको संयुक्त बैठकमा दलहरूले पहिलोपटक आ–आफ्ना दाबी पेस गरेका थिए । कांग्रेसले सय, माओवादीले ६०, एकीकृत समाजवादीले ४०, जसपाले ३१ सिट र राष्ट्रिय जनमोर्चाले दुई सिटमा दाबी गरेका थिए । दलहरूले ०७४ र ०७९ को निर्वाचनलाई आधार बनाएर आफ्नोअनुकूल हुने गरी सिट दाबी गरेका थिए । तर, उनीहरूले निर्वाचन क्षेत्र भने खुलाएका छैनन् । 

राष्ट्रिय जनमोर्चाबाट कार्यदल सदस्य रहेका नेता हिमलाल पुरीले बुधबारको बैठकमा दलहरूले यसअघि प्रस्तुत गरेको दाबीका विषयमा छलफल गरेका थिए । ‘दलहरूले यसअघि राखेको दाबीको विषयमा बैठकमा छलफल भयो । तर, बैठक टुंगोमा पुग्न सकेन,’ उनले भने, ‘दलहरू आ–आफ्नो अडान छाडेर लचिलो हुने समझदारी बनेको छ । अर्को बैठकमा यसबारे छलफल हुनेछ ।’

कार्यदल गठनको करिब एक महिनासम्म पनि सिट टुंगो लाग्न नसकेपछि गठबन्धनमा शीर्ष नेतृत्वमाथि दबाब परेको छ । ११ सदस्यीय कार्यदलमा सहमति जुट्न नसकेपछि शीर्ष नेताले राजनीतिक निर्णयबाट टुंग्याउने तयारी गरिरहेका छन् । निर्वाचन आयोगले तयार गरेको आन्तरिक कार्यतालिकाअनुसार २ र ३ असोजमा समानुपातिकतर्फको बन्दसूची पेस गर्ने समय छ । जसका लागि दलहरूसँग १८ दिन समय छ । त्यस्तै, २३ देखि २६ असोजसम्ममा प्रत्यक्षतर्फको उम्मेदवारी दर्ताको कार्यतालिका छ । बाँडफाँड लम्बिए दलहरूलाई पार्टीभित्र छलफल गरेर उम्मेदवार टुंगो लगाउन अप्ठ्यारो हुने नेताहरूले बताउँदै आएका छन् ।