दमकमा गैरकानुनी अभ्यासको बचाउमा एमाले 

संविधान संशोधन गरेर स्थानीय तहमा प्रतिपक्षी दलको व्यवस्था गर्नुपर्ने माग

दमक नगरपालिकामा गैरकानुनी अभ्यास गर्दै संसदीय दल बनाएको एमालेले स्थानीय तहमा प्रतिपक्षीको व्यवस्था गर्न माग गरेको छ । संविधान संशोधन गरेर भए पनि स्थानीय तहमा प्रतिपक्षी दलको व्यवस्था गर्नुपर्र्ने उसको माग छ । 

बुधबार दमकमा पत्रकार सम्मेलन गर्दै एमाले प्रदेश कमिटी सदस्य लोकबहादुर धिमालले संविधान संशोधन गरेर स्थानीय तहमा पक्ष र विपक्षको व्यवस्था गर्नुपर्ने बताए । उनी एमालेले नगरपालिकामा बनाएको संसदीय दलका नेता हुन् । 

दमकमा प्रमुख र उपप्रमुख जित्न नसके पनि एमालेले दुईतिहाइ जनप्रतिनिधि जितेको छ । एमालेले प्रतिपक्षीको रूपमा संसदीय दल नै बनाएर खेलिरहेको भूमिका संविधान र स्थानीय सरकार सञ्चालन ऐनविपरीत भएको समाचार आइतबार नयाँ पत्रिकामा प्रकाशित भएको थियो । ‘ओलीको गृहनगरमा एमालेले गर्‍यो गैरकानुनी अभ्यास : दमक नगरपालिकामा संसदीय दल बनाएर प्रतिपक्षको भूमिका’ शीर्षकमा प्रकाशित समाचारप्रति असन्तुष्टी जनाउँदै धिमालले संविधान संशोधन गरेर भए पनि स्थानीय तहमा प्रतिपक्षी दलको व्यवस्था गर्नुपर्ने माग राखे । 

समाचारमा संविधानविद् भीमार्जुन आचार्यको भनाइ पनि समेटिएको थियो । ‘संविधानमा तीन तहको सरकारको व्यवस्था छ । संघ, प्रदेश र स्थानीय तहबीच सिद्धान्तमै फरक छ । स्थानीय तहमा सत्तापक्ष र प्रतिपक्ष व्यवस्था गर्न खोज्नु संविधानविपरीत हो । निर्वाचनमा कसैको जित कसैको हार त भइहाल्छ । स्थानीय तहका जनप्रतिनिधि दलभन्दा जनताप्रति बढी उत्तरदायी हुन्छ र हुनुपर्छ,’ आचार्यले नयाँ पत्रिकासँग भनेका थिए, ‘कि त संविधान नै संशोधन गर्नुपर्‍यो । होइन भने जसले कोसिस गरे पनि यो अभ्यास संविधानविपरीत हो । त्यस्तो व्यवस्थाका लागि त पहिले संविधान संशोधन गर्नुपर्छ ।’ 

प्रतिपक्षी दलको नेताको हैसियतमा धिमालले कार्यालयका लागि कोठा र सवारी सुविधा मागेको नगर प्रमुख रामकुमार थापाले बताएका थिए । तर, धिमालले यसको खण्डन गरे । सबै कार्यपालिका सदस्यका लागि एउटा कोठा माग गरे पनि गाडी नमागेको उनको दाबी छ । ‘हामीले दमक नगरपालिकासँग गाडी मागेका छैनौँ । मसँग तीनवटा गाडी छन् । बरू नगरपालिकाले माग्यो भने म भाडामा दिन सक्छु । तेलका लागि ७२ लाख बजेट छुट्याउने भनेपछि कसरी त्यत्रो तेल लाग्छ ? गाडी दुरुपयोग भयो कि भनेर सोधेको हो । गाडी मागेको हैन,’ उनले भने, ‘मेयर–उपमेयर र वडाध्यक्षहरूका लागि कार्यकक्ष छ । हामीले मान्छे कहाँ भेट्ने ? हाम्रो मान्छेलाई मेयरको कोठामा लगेर भेट्ने ? त्यही भएर कार्यपालिका सदस्यका लागि एउटा कोठा मागेका हौँ । अब त्यो पनि चाहिएन । हामी चौरीमा भेट्छौँ । हामीलाई माग्ने मान्छे सम्झनुभयो ।’ 

दमकमा निर्वाचित ५५ जना जनप्रतिनिधिमध्ये एमालेका विश्वनाथ बराल जिल्ला समन्वय समिति झापाका प्रमुख निर्वाचित भएका छन् । हाल एमालेबाट निर्वाचित ४१ जना र राप्रपा, कांग्रेस, जसपा, माओवादीसहितको गठबन्धनबाट नगर प्रमुख, उपप्रमुखसहित १३ जना निर्वाचित छन् । एमालेले बनाएको संसदीय दलको उपनेतामा दमक–५ का वडाध्यक्ष इन्द्र गुरुङ र सचिवमा कार्यपालिका सदस्य शारदा भट्टराई छन् । 

उनले नगर प्रमुख र नगरसभा सदस्यको हैसियत बराबर भएको दाबी गरे । ‘मेयर पनि दमकमा निर्वाचित ५५ जना नगरसभा सदस्यभित्रै पर्नुहुन्छ । उहाँ पनि हामीसमान हुनुहुन्छ,’ उनले भने, ‘हप्किदप्की गरेर नगरसभा चल्छ ?’

दमक नगरपालिकाका पूर्वनगर प्रमुख तथा एमाले केन्द्रीय सदस्य रोमनाथ ओलीले एमालेको विधानमै पालिका दलको व्यवस्था भएको दाबी गरे । उनले विगतमा पनि दमक नगरपालिकामा पालिका दलको अभ्यास भएको पनि दाबी गरे । उनले संसदीय दलको समाचार लेखेर विषयलाई ‘ट्विस्ट’ गर्न खोजिएको आरोप लगाए ।