- वि.सं २o८१ बैशाख २५ मंगलबार
गृहमन्त्री बालकृष्ण खाणले नागरिकता विधेयक पारित गर्न उच्च तहमा छलफल भइरहेको बताएका छन् । बुधबार प्रतिनिधिसभाअन्तर्गतको राज्य व्यवस्था तथा सुशासन समितिको बैठकमा बोल्दै गृहमन्त्री खाणले नागरिकतासम्बन्धी विधेयक पारित गर्न सांसदहरूको तहमा र उच्च राजनीतिक तहमा छलफल भइरहेको बताएका हुन् । सो विधेयकबारे निष्कर्ष निकाल्नुपर्ने अवस्था रहेको बताए ।
‘नागरिकतासम्बन्धी विधेयक यो समितिमा झन्डै २२ महिना छलफल भएर प्रतिवेदनको रूपमा अहिले प्रतिनिधिसभामा छ,’ उनले भने, ‘त्यसबारे माननीय तहमा पनि र उच्च तहमा पनि छलफल भइराखेको छ । र, त्यसलाई पनि एउटा निष्कर्ष निकाल्नुपर्ने अवस्था रहेको छ ।’
गृहमन्त्री खाणले आगामी दिनमा एकीकृत सामाजिक सुरक्षा ऐन बनाउने सम्बन्धमा सरकारले गृहकार्य गर्ने बताए । उनले सामाजिक सुरक्षा ऐन, २०७५ लाई संशोधन गर्न बनेको विधेयकलाई पनि छिट्टै पारित गर्नुपर्ने बताए । उनले संसदीय समितिहरूलाई प्रभावकारी बनाउन सरकार सकारात्मक सहयोग गर्न तयार रहेको पनि बताए ।
