मलेसियामा जारी एसिसी महिला टी–२० च्याम्पियनसिपअन्तर्गत नेपालले आज हङकङसँग प्रतिस्पर्धा गर्दै छ । चौथो खेलमा मंगलबार किनरारा ओभलमा नेपालले हङकङको सामना गर्न लागेको हो । नेपाल र हङकङबीचको खेल दिउँसो १२ बजेबाट सुरु हुनेछ ।

नेपाल हङकङलाई हराएर लगातार चौथो जित निकालेर समूह विजेता बन्ने दाउमा छ । समूह ‘बी’मा रहेको नेपाल तीन खेलमा ६ अंक जोड्दै शीर्ष स्थानमा छ । २ खेलमा चार अंक जोडेर हङकङ दोस्रो स्थानमा रहेको छ । यसअघि नेपालले भुटानलाई ५०, कुवेतलाई २५ रन र बहराइनलाई आठ विकेटले पराजित गरेको थियो ।