- वि.सं २०८० जेठ १९ शुक्रबार
महोत्तरीको बर्दिबास नगरपालिका– ८ मा मतगणना सम्पन्न भएर निर्वाचित भएको घोषणा गरिसकेपछि थप मतपेटिका भेटिएको छ। पालिकाकै अन्तिम वडाको मतगणनाका लागि बाकस निकाल्ने क्रममा निर्वाचित भएको घोषणा गरिसकिएको वडा नं. ८ को मतपेटिका फेला परेको हो।
बिहीबार बिहान राजनीतिक दलसहित निर्वाचन कार्यालयका कर्मचारीहरू गणनाका लागि मतपेटिका राखेको स्थानमा पुगेर अन्तिम बचेको बाकस हेर्दा वडा नं. ८ को रहेको पाइएको हो।
सो वडामा सात सय ५१ मत ल्याएका नेकपा माओवादी केन्द्रका शमशेरसिंह लामा निर्वाचित भएको घोषणा भइसकेको थियो। उनका निकटतम् प्रतिद्वन्द्वी रहेका नेकपा एमालेका रुद्रबहादुर किङरिङले सात सय ४४ मत ल्याएका थिए। सबै मत गणना गर्नुअघि नै विजेता घोषणा भएपछि मतगणनामा धाँधली भएको भन्दै एमालेका उम्मेदवार किङरिङले मुद्दासमेत हालिसकेका छन्।
यस विषयमा बर्दिबासस्थित निर्वाचन अधिकृत भूपेन्द्र सापकोटासँग कुरा गर्न खोज्दा उनले आफू अश्वस्थ भएकाले कुरा गर्न नसक्ने प्रतिक्रिया दिए। यता मुख्य निर्वाचन अधिकृत दीपक खरेलले आफूले समेत यस घटनाबारे फोनमार्फत जानकारी पाएको बताउँदै बर्दिबासमा सर्वदलीय बैठकको तयारी भइरहेको जानकारी दिए। यसबारे कार्यालयले निर्वाचन आयोगमा पत्राचार गरिसकेको छ।
