- वि.सं २o७९ बैशाख १४ बुधबार
स्थानीय निर्वाचनमा बर्दिया जिल्लामा एकै घरका विभिन्न पदमा उम्मेदवारी परेको छ । बर्दियाको गेरुवा गाउँपालिकामा एकैघरका ससुरा र बुहारी फरक–फरक पार्टीबाट उम्मेदवार बनेका छन् । गेरुवा गाउँपालिका– ३ का बलबहादुर थारू नेकपा माओवादी केन्द्रबाट वडाध्यक्ष पदमा उमेदवार भएका छन् भने उनकी बुहारी लक्ष्मीकुमारी चौधरी नेपाली कांग्रेसको तर्फबाट पालिकाको उपाध्यक्षमा उम्मेदवार भएकी छिन् । ०७४ को स्थानीय निर्वाचनमा पनि वडाध्यक्षको उम्मेदवार रहेका थारू दुई मतले पराजित भएका थिए ।
यता राजापुर नगरपालिकामा पनि एउटै परिवारका दुईजना प्रमुख र उपप्रमुख पदमा उम्मेदवार बनेका छन् । राजापुर नगरपालिकाको प्रमुख पदका लागि श्रीमान् राममणि उपाध्याय र उपप्रमुख पदका लागि श्रीमती सम्झना उपाध्यायले उम्मेदवारी दिएका छन् । उनीहरूले राष्ट्रिय प्रजातन्त्र पार्टीको तर्फबाट उम्मेदवारी दिएका हुन्।
ठूला दलले नै दिएनन् प्रमुखमा महिला उम्मेदवार
जिल्लाका आठवटा पालिकामा तीन ठूला दलका तर्फबाट मेयर–अध्यक्ष पदमा महिलाको उम्मेदवार नै दिएनन् । जिल्लाका बाँसगढी, मधुवन, बारबर्दिया, गुलरिया, ठाकुरबाबा र राजापुर नगरपालिका तथा बढैयाताल र गेरुवा गाउँपालिकामा ठूला दलले प्रमुख पदमा महिला उम्मेदवार बनाएन् । ठूला दल सबैले महिलालाई उपप्रमुखमा सीमित गरेका छन् ।
केही साना दलका तर्फबाट प्रमुखमा महिला उम्मेदवार
ठूला दलले मेयर–अध्यक्ष पदमा महिला उम्मेदवार नबनाए पनि केही साना दलले भने महिला उम्मेदवार बनाएका छन् । बारबर्दिया नगरपालिकामा नेपाल मजदुर किसान पार्टीबाट मञ्जु चौधरी, बढैयाताल गाउँपालिकामा नेकपा एकीकृत समाजवादीबाट कौशिलासिंह ठकुरी र मधुवन नगरपालिकामा जनता समाजवादी पार्टीबाट निता सिंहलाई मेयर–अध्यक्ष पदमा मनोनयन दर्ता गराएका छन् । केही स्वतन्त्र उम्मेदवारमा महिला छन् । बर्दिया जिल्लाको कुल मतदाता संख्या तीन लाख ११ हजार चार सय १० जना रहेको छ ।
