- वि.सं २o७९ बैशाख ११ आइतबार
नेकपा एमालेले चितवनका सातै पालिका प्रमुखका उम्मेदवार टुंग्याएको छ । माडी नगरपालिका र भरतपुर महानगरपालिकामा राप्रपासँग तालमेल गर्ने भएपछि एमालेले उपमेयरको उम्मेदवार भने टुंग्याउन सकेको छैन । अन्य पाँच पालिकामा भने एमालेले उपमेयरको उम्मेदवार पनि टुंग्याइसकेको छ ।
राप्ती नगरपालिकाको मेयरमा गोविन्द कँडेल र उपमेयरमा मेनका पाठक उम्मेदवार बन्ने भएका छन् । खैरहनीमा यसअघिकै मेयर लालमणि चौधरी दोहोरिने भएका छन् भने उपमेयरमा कविता उप्रेती उपमेयर उठ्ने पक्का भएको छ । रत्ननगरको मेयरमा विमला दुवाडी र उपमेयरमा यादव पाठक उठ्ने भएका छन् । दुवाडी यसअघि उपमेयर थिइन् । कालिकाको मेयरको उम्मेदवारमा विनोद रेग्मी र उपमेयरमा विमला लामा चयन भएका छन् ।
यसैगरी एमालेले माडीको प्रमुखमा ताराकाजीकुमारी महतो, इच्छाकामनाको प्रमुखमा दानबहादुर गुरुङ र उपप्रमुख माया सिलवाललाई उठाउने भएकाे छ । एमालले भरतपुरको मेयरमा यसअघि नै विजय सुवेदीको नाम टुंग्याएको थियो ।
