- वि.सं २o७८ फाल्गुण २७ शुक्रबार
पाहुना टोली सिक्किमको रेडपान्डा फुटबल क्लबविरुद्ध ५–१ को फराकिलो जित निकाल्दै घरेलु टोली झापा–११ झापा गोल्डकप फुटबल प्रतियोगिताको सेमिफाइनलमा प्रवेश गरेको छ । झापाले फाइनल प्रवेशका लागि शनिबार संकटा क्लबसँग प्रतिस्पर्धा गर्नेछ ।
बिर्तामोडस्थित डोमालाल राजवंशी रंगशालामा बिहीबार सम्पन्न खेलमा झापाका लागि विमल घर्र्तीमगर, विशाल राई बी र विश्वास श्रेष्ठले गोल गरे । झापाले एक गोल आत्मघातीका रूपमा पाएको थियो । ५५औँ मिनेटमा सिक्किमका पिन्सो भुटियाले डिबक्समा बल क्लियर गर्ने क्रममा आत्मघाती गोल गर्न पुगे । तीनजना राष्ट्रिय टोलीका खेलाडीसहित मैदानमा उत्रिएको झापाले खेलमा सुरुवाती अग्रता लियो ।
झापाका लागि विमलले खेलको ३१औँ मिनेटमा पेनाल्टी गोल गरेका थिए । सिक्किमका सागर गुरुङले झापाका रूपेश बर्तौलालाई डिबक्समा फल गरेपछि प्राप्त पेनाल्टीमा विमलले गोल गरेका हुन् ।
५८औँ मिनेटमा कप्तान विशालले तेस्रो गोल गरे । सिक्किमका गोलरक्षक निन्डुप लेप्चाबाट रिबाउन्ड भएको बललाई उनले सहजै गोलपोस्टको दिशा दिए । झापाले खेलको ७७औँ मिनेट पेनाल्टीको अर्को अवसर पायो । सिक्किमका पिन्सोले डिबक्समा ह्यान्ड गरेपछि विमलले नै पेनाल्टी गोल गरे । खेलको ८९औँ मिनेटमा झापाका विश्वास श्रेष्ठ मध्यभागबाट एकल प्रयासमा उत्कृष्ट गोल गरे ।
झापाका विशाल बस्नेतले अमन रसाइलीलाई डिबक्समा लडाएपछि सिक्किमले पेनाल्टी पायो । जसलाई योगेश मगरले गोल गरे । तुलनात्मक रूपमा सिक्किम निकै कमजोर देखियो । सिक्किमले ‘मुभ’ नै बनाउन सकेन । सिक्किमले थोरै मात्र मुभ बनायो । झापाले ए डिभिजन लिग विजेता मच्छिन्द्रका चार खेलाडी मैदानमा उतारेको थियो । खेल हुने अघिल्लो दिन मात्र खेलाडीको टुंगो लागेका कारण झापाका खेलाडीबीच समन्वय अभाव देखिन्थ्यो ।
झापाका प्रशिक्षक सन्तोष गुरुङले सेमिफाइनलमा संकटाविरुद्ध जित निकाल्ने विश्वास व्यक्त गरेका छन् । ‘टिम सेट नभएर केही समस्या भएको हो, खप्तडको खेल जुधेर समयमा टिम बनाउन सकेनौँ,’ गुरुङले भने, ‘चारजना खेलाडी बिहीबार मात्र नै आएका हुन् ।’ उनले सेमिफाइनलमा संकटालाई जित्ने दाबी गरे ।
यसैगरी रेडपान्डाका प्रशिक्षक निकोलस राईले खेलाडी घाइते भएका कारण खेल सोचेजस्तो नभएको बताए । ‘खेलाडीहरू घाइते थिए, जसका कारण सोचेजस्तो भएन,’ उनले भने, ‘केही गल्तीका कारण पेनाल्टी र अन गोल भयो ।’
