- वि.सं २o७८ फाल्गुण २५ बुधबार
अन्तर्राष्ट्रिय श्रमिक महिला दिवसका अवसरमा सांग्रिला बुक्स र बुद्ध एयरको सहकार्यमा काठमाडौंबाट बुद्ध एयरबाट यात्रा गर्ने पहिलो दुई हजार पाँच सय यात्रुलाई पुस्तक उपहार दिइएको छ ।
सांग्रिला बुक्सले प्रकाशन गरेका १३ महिला लेखकका उपन्यास, जीवनी, आत्मकथा, कविता तथा राजनीतिक विषयका आख्यान तथा गैरआख्यानका पुस्तक निःशुल्क वितरण गरिएको हो ।
पहिलो पुस्तक धनगढी हिँडेकी कृष्णा ओझाले पाएकी थिइन् । बुद्ध एयरसँगको यस सहकार्यबाट नारी स्रष्टाका कृतिहरूले व्यापकता पाउने र पठन संस्कृतिलाई पनि सघाउ पुग्ने विश्वास सांग्रिला बुक्सले लिएको छ ।
यात्रुहरूले पुस्तक पाउँदा खुसी लागेको बताउँदै यस्तो प्रयासले नेपाली साहित्यमा टेवा पुग्ने प्रतिक्रिया दिए । नेपालमा यसअघि कहिल्यै यस्तो नदेखेको र यात्रुहरूले पुस्तक अविस्मरणीय उपहार भएको जनाए ।
