- वि.सं २o७८ माघ २६ बुधबार
प्रथम इन्डोर कर्पोरेट लिग क्रिकेट (आइसिएल) लिग प्रतियोगिता फागुन तेस्रो साता हुने भएको छ । हिमालय स्पोर्ट्स म्यानेजमेन्ट प्रालिले बुधबार पत्रकार सम्मेलन गरी ग्रेट हिमालय क्रिकेट एकेडेमीको सहकार्यमा प्रथम इन्डोर कर्पोरेट लिग क्रिकेट आयोजना गर्ने जानकारी गराएको हो । प्रतियोगिता फागुन १८ देखि २१ गतेसम्म हात्तीवनस्थित ग्रेट हिमालय क्रिकेट एकेडेमीको नवनिर्मित हलमा आयोजना हुनेछ । कुल १६ टोलीले सहभागिता जनाउने प्रतियोगितामा १० ओभरको खेल हुने आयोजकले जनाएको छ । लिगको एक टोलीमा १० जना रहनेछन् । १० मध्ये ८ खेलाडीले एक खेलमा सहभागिता जनाउन पाउनेछन् ।
लिग कम नक आउट फर्म्याटमा खेलाइने लिगको दर्ता शुल्क ४० हजार रहेको छ । विजेता टोली तथा उत्कृष्ट खेलाडीलाई आकर्षक पुरस्कार वितरण गरिने आयोजकले जनाएको छ । चार दिनसम्म सञ्चालन हुने प्रतियोगितामा कुल २७ खेल हुनेछन् ।
