- वि.सं २o७८ माघ १६ आइतबार
सत्तारुढ प्रमुख दल कांग्रेसका नेता दीपक खड्काले सत्तारुढ गठबन्धन आगामी निर्वाचनसम्म कायमै रहने बताएका छन् । आइतबार काठमाडौंमा आयोजित एक साक्षात्कार कार्यक्रममा खड्काले कांग्रेसले गठबन्धनमा रहेका दलहरूलाई निर्वाचनमा सँगै लिएर जाने सोच बनाएको बताएका हुन् ।
उनले संविधान र ऐनका बीचमा धेरै कुराहरु मिलाउनुपर्ने भए पनि निर्वाचनको मुखमा धेरै चलाउन नहुने बताए । खड्काले प्रमुख प्रतिपक्षी दल एमालेले संसद्लाई सुचारु गरेर मुलुकलाई निकास दिनुपर्ने पनि बताए ।
एमाले नेता शेरबहादुर तामाङले आगामी वैशाखभित्रै निर्वाचन गर्नुपर्ने बताए । वैशाखसम्ममा निर्वाचन गर्न सम्भव रहेको उनको तर्क छ । सरकारले छिटोभन्दा छिटो निर्वाचनको मिति तोक्नुपर्ने माग उनले गरे ।
नेकपा (माओवादी केन्द्र) का नेता रामनारायण बिडारीले स्थानीय तह निर्वाचनको सम्बन्धमा संविधान र ऐन बाझिएको भन्दै ऐनको संशोधन गर्नुपर्ने आवश्यकता रहेको बताए । उनले ऐन सच्याएर मात्रै निर्वाचन गर्नुपर्ने धारणा राखे ।
लोकतान्त्रिक समाजवादी पार्टीका नेता लक्ष्मणलाल कर्णले सत्तारुढ गठबन्धन स्थानीय तहको निर्वाचनको पक्षमा हुनु सकारात्मक भएको बताए । स्थानीय तहको निर्वाचन जेठ ५ गतेभन्दा पछाडि लानु नहुने उनले बताए ।
