हिमाली जिल्ला मनाङमा हिमपात र चिसोका कारण विकास निर्माणको काम ठप्प छ। निर्माण कार्य थालेका योजना हिमपात र चिसोका कारण रोकिएका छन् । गत असार १ गतेको भीषण बाढीपहिरोका कारण क्षतिग्रस्त पुल, सडकलगायत संरचना निर्माण कार्य हिमपातका कारण सामान ढुवानी नहुँदा रोकिएको मनाङका प्रमुख जिल्ला अधिकारी रवीन्द्रप्रसाद आचार्यले बताए ।

उनले भने, ‘असार १ को बाढीपहिरोले भत्किएका सडक र पुल  निर्माणलाई तीव्र बनाउनुपर्ने समयमा चिसो बढेपछि हिमपातका कारण विकास निर्माणको काम प्रभावित भएको हो ।’ गर्मीमा बाढीपहिरोले सामग्री ढुवानी हुन नसक्दा निर्माण काम हुन सकेन हिउँदमा हिमपातले सवारीसाधन आवतजावत हुन नसक्दा निर्माणका काम रोकिएको प्रजिअ आचार्यको भनाइ छ ।

उनका अनुसार हिमपातका कारण विकास निर्माणमा आवश्यक सामग्री ल्याउन नसकिने र ल्याएर राखिएका सामग्री हिमपातले जमेर काम नलाग्ने भएका छन्। मनाङमा हिमपात र बर्खायामको दुवै सिजन मौसमले साथ दिँदैन मनाङको नासों गाउँपालिकाका अध्यक्ष चन्द्र घलेले भने। मनाङमा मंसिर अन्तिमबाट विकास निर्माणका काम रोकिएका हुन्। माथिल्लो मनाङमा मंसिर तेस्रो साताबाट हिमपात भएको थियो।

मनाङमा हिमपात भएसँगै तापक्रम माइनसमा झरेको छ। बुधबार साँझदेखि पुन हिमपात हुँदा मनाङको तापक्रम माइनस ७ देखि माइनस १० डिग्री सेल्सियस छ ।  हिमपात भएसँगै माथिल्लो मनाङमा सडक र बाटो पूरै हिउँले ढाकिएको छ । पैदल बाटो हिउँले पुरिएको छ । हिमपात भएसँगै तल्लो मनाङको नासोँ–९ दानाक्युबाट माथि सवारी आवागमन ठप्प हुने स्थानीय अनिता लामा बताउँछिन् ।

विगतका वर्षहरूको तुलनामा यस वर्ष मनाङमा बाढीपहिरोले भौतिक संरचनामा क्षति धेरै पुर्‍याएको छ । बाढीपहिरोले क्षति पुर्‍याएका भौतिक संरचना निर्माणको कामसमेत अलपत्र अवस्थामा छन् ।