- वि.सं २o७८ पौष २८ बुधबार
जलनपीडित बालबालिकाको उपचारका लागि निजी क्षेत्रबाट ठूलो सहयोग हुने भएको छ । पाल्पा सिमेन्ट प्रा.लि.ले जलनपीडित बालबालिकाको उपचारका लागि ६० लाख रुपैयाँ सहयोग गर्ने भएको छ । काठमाडौंको साँखुस्थित सुष्मा कोइराला मेमोरियल अस्पतालमा उपचार गर्ने १८ वर्षमुनिका बालबालिकाको उपचारका लागि पाल्पा सिमेन्टले वार्षिक ६० लाख रुपैयाँ सहयोग गर्ने भएको हो ।
सुष्मा कोइराला मेमोरियल अस्पताल नेपालकै पहिलो जलन उपचार हुने अस्पताल हो । २५ वर्षअघि स्थापित सो अस्पतालमा उपचार गराउने जलनपीडित बालबालिकाको उपचारमा पाल्पा सिमेन्टले सहयोग गर्ने भएको हो । सहयोगसम्बन्धी सम्झौतामा पाल्पा सिमेन्टका तर्फबाट कार्यकारी निर्देशकहरू राजेशकुमार अग्रवाल र विष्णुकुमार अग्रवाल तथा अस्पतालको तर्फबाट मेडिकल डाइरेक्टर डा. सन्तोष भण्डारी र सामाजिक अभियन्ता उज्ज्वलविक्रम थापाले हस्ताक्षर गरेका छन् । अस्पतालमा आयोजित एक समारोहबीच सहयोगसम्बन्धी सम्झौतामा हस्ताक्षर भएको हो ।
सहयोगसम्बन्धी सम्झौतामा विभिन्न प्रकारको जलनबाट हुने पीडित १८ वर्षमुनिका बालबालिकाको अस्पतालले निःशुल्क उपचार गराउने उल्लेख छ । साथै, सिमेन्ट कम्पनीको तर्फबाट वार्षिक ६० लाख रुपैयाँ उपलब्ध गराउने उल्लेख छ । सामाजिक अभियन्ता उज्ज्वलविक्रम थापाको पहलका कारण सामाजिक उत्तरदायित्वअन्तर्गत आफ्नो कम्पनीले जलनपीडितका लागि निःशुल्क उपचार गराउन सहयोग गरिएको पाल्पा सिमेन्टका कार्यकारी निर्देशक विष्णुकुमार अग्रवालले बताए ।
सो अवसरमा मेडिकल डाइरेक्टर भण्डारीले जलनबाट पीडितको उपचारका लागि कम्पनीको तर्फबाट सहयोग प्राप्त भएकोमा विशेष धन्यवाद दिएका थिए । उनले जलनपीडितहरू अधिकांश गरिब र असहाय हुने भएकाले सो सहयोगबाट महत्वपूर्ण सघाउ पुग्ने बताए ।
सामाजिक अभियन्ता थापाले जलनपीडितको उपचारका लागि पाल्पा सिमेन्टले सामाजिक उत्तरदायित्वअन्तर्गत गरेको सहयोगले महत्वपूर्ण सेवा पुग्ने बताए । विभिन्न प्रकारका जलनबाट नेपालमा मात्र वार्षिक ५० हजार पीडित हुने गरेका छन् ।
