- वि.सं २o७८ पौष १५ बिहीबार
सूर्य नेपाल गल्फ टुरअन्तर्गतको इस्टर्न ओपन गल्फ प्रतियोगितामा धरानका शुक्रबहादुर राई च्याम्पियन भएका छन् । पार ७० को धरान गल्फ कोर्समा समग्रमा एक अन्डर २०९ स्कोरसहित शुक्रबहादुर च्याम्पियन बन्दै ट्रफीसँगै नगद एक लाख ३५ हजार हात पारेका छन् ।
बुधबार भएको खेलमा उनी एक ओभर ७१ को कार्ड बनाउन सफल भए । फ्रन्ट नाइनमा उनले लेभल पार ३६ खेलेका थिए । ब्याक नाइनमा एक ओभर ३७ को कार्ड बनाए । शुक्र नेपालकै नम्बर १ गल्फर मानिन्छन् ।
कुल सात ओभर २१७ स्कोरका साथ धरानकै व्यावासयिक खेलाडी बलभद्र राई दोस्रो भए । उनले नगद ८८ हजार जितेका छन् । तेस्रो स्थानमा रहेका धराने खेलाडी निरज तामाङले पनि कुल नौ ओभर २१९ स्कोर खेले । उनले नगद ६५ हजार हात पारे । यसैगरी, कुल १० ओभर २२० स्कोरका साथ चौथो हुँदै सञ्जय लामाले ५३ हजार पाँच सय जिते ।
एमेच्योरतर्फ भने कुल चार ओभर २१४ स्कोरका साथ सुवास तामाङ विजेता भए । १३ ओभर २२३ स्कोरका साथ युवराज भुजेल दोस्रो भए । विजेता खेलाडीहरूलाई सूर्य नेपाल प्रालिका एसिस्टेन्ट ब्रान्ड मेनेजर नगेन सरोज, धरान गल्फ क्लबका अध्यक्ष वीरेन्द्रविक्रम लिम्बूलगायतले पुरस्कार प्रदान गरेका छन् ।
