- वि.सं २o७८ कार्तिक ७ आइतबार
सल्यानमा गाडी दुर्घटनामा परी एकजनाको मृत्यु भएको छ भने सातजना घाइते भएका छन्। दुर्घटनामा परी बागचौर नगरपालिकानिवासी १८ वर्षीय आशिष बस्नेतको मृत्यु भएको प्रहरीले जनाएको छ ।
आइतबार बिहान करिब ७ः५० बजे सल्यानको बागचौरबाट दाङतर्फ गइरहेको भे.१च १८९० नम्बरको बोलेरो जिप डबल क्याब कपुरकोट– ३ स्थित मूलपानी वनस्पति उद्याननजिकै दुर्घटनामा परेको जिल्ला प्रहरी कार्यालय सल्यानका प्रवक्ता इन्स्पेक्टर अर्जुन पौडेलले जानकारी दिए ।
दुर्घटनामा घाइते हुनेहरूको उपचार प्रादेशिक अस्पताल तुल्सीपुरमा भइरहेको पनि उनले जनकारी दिए। अन्य घाइतेहरूमा बागचौर नगरपालिका– १ सल्यान निवासी अन्दाजी १४ वर्षीय आयुश बस्नेत, २२ वर्षीय मनोज बस्नेत, बानपा– २ की अन्दाजी २७ वर्षीया सीता वली, २८ वर्षीया बबिता रावल र निजकी ११ वर्षीया छोरी एसिका रेउले तथा गाडीचालक बानपा– २ का १९ वर्षीय हिक्मत पुनमगर रहेको प्रहरीले जनाएको छ ।
यस्तै, बानपा– २ कै १९ वर्षीय अर्जुन केसीको अवस्था सामान्य छ। उनको कपुरकोटस्थित स्थानीय मेडिकलमा उपचार भइरहेको प्रहरीले जनाएको छ । गाडी सडकबाट एक सय मिटरभन्दा तल खोल्सामा खसेको छ । दुर्घटनाको कारण खुल्न सकेको छैन। घटनाबारे थप अनुसन्धान भइरहेको प्रहरीले जनाएको छ ।
