परराष्ट्रमन्त्री डा. नारायण खड्काले अमेरिकी सहयोग परियोजना मिलेनियम च्यालेन्ज कर्पोरेसज (एमसिसी) संशोधन हुन नसक्ने टिप्पणी गर्दै राजनीतिक सहमतिमा पास गर्ने वा नगर्ने टुंगो लगाउनुपर्ने बताएका छन् । संयुक्त राष्ट्रसंघको ७६औँ महासभामा सहभागी हुन न्युयोर्क पुगेका खड्काले गैरआवासीय नेपाली संघद्वारा आयोजित कार्यक्रममा एमसिसीबारे सैद्धान्तिक विवाद खडा गर्नु आवश्यक नभएको पनि उल्लेख गरे ।
एमसिसी जस्ताको तस्तै पारित गर्न नहुने सत्तारुढ माओवादी र एकीकृत समाजवादी पार्टीका नेताहरूले बताइरहेका वेला परराष्ट्रमन्त्री खड्काले एमसिसी संशोधन नहुने बताएका हुन् । ‘एमसिसी हामीले मागेको परियोजना हो ।
यो सम्झौता हुने वेलामा कांग्रेस एक्लै सरकारमा थिएन, त्यो वेला सत्तारुढ दल कसैले पनि यसबारे चर्चा गरेका छैनन्,’ खड्काले भने, ‘एमसिसी संशोधनको कुरा अमेरिकीहरूले मान्दैनन् । किन मान्दैनन् भने यो एउटा निश्चित ढाँचामा हुन्छ, सबै देशमा एउटै ढाँचा लागू हुन्छ । एउटा देशको संशोधन गर्दा सबै देशको सम्झौता संशोधन गर्नुपर्छ । त्यसकारण एमसिसी अमेरिकाले संशोधन गर्दैन ।’
