अमेरिकामा फेरि फैलियो कोरोना : बालबालिका बढी संक्रमित

अमेरिकामा कोरोना भाइरस फेरि एकपटक तीव्र रूपमा फैलिरहेको छ । यसपटक कोरोनाको असर स–साना बालबालिकामाथि परेको छ ।अमेरिकाका ३४ राज्यका अधिकांश बालबालिका कोरोना संक्रमित भएको विभिन्न अन्तर्राष्ट्रिय एजेन्सीहरूले जनाएका छन् । यी राज्यहरूमा कोरोनाका कारण गम्भीर रूपमा बिरामी भएका बालबालिका पहिलोपटक अस्पताल भर्ना भएका छन् ।

दुई महिनादेखि १२ वर्ष उमेरसम्मका बालबालिका कोरोनाबाट थलिएका छन् । यो एक साताभित्र ३४ राज्यका एक लाख ८० हजार बालबालिका संक्रमित भएको मिडियाहरूले जनाएका छन् । जसमध्ये ६ हजार एक सयको अवस्था चिन्ताजनक छ । सबैजसो राज्यका चिकित्सकहरूले एक सातादेखि बिदामा नबसी उपचार गरिरहेको अमेरिकन एकेडेमी अफ पेडियाट्रिक्स र चिल्ड्रेन हस्पिटल एसोसिएसनले जनाएका छन् । 

कतिपय राज्यमा पर्याप्त चिकित्सक (डाक्टर र नर्स) नहुँदा उनीहरूलाई दोहोरो तलब दिँदै ड्युटी गराइएको छ । यस्तै, पर्याप्त अक्सिजन, आइसियू तथा भेन्टिलेटरसमेत नहुँदा उनीहरूको उपचारमा समस्या भइरहेको छ । ठूलो समस्या भनेकै एक वर्षमुनिका बालबालिकाको उपचार गर्न भइरहेको चिकित्सकले बताएका छन् ।

 आमाबुबाबाट टाढा रहेका ती कलिला बालबालिकाको श्वासप्रश्वासमा समस्या आएको चिकित्सकहरू बताउँछन् । गम्भीर रूपमा संक्रमित भएका बालबालिकाको भेन्टिलेटरमा उपचार भइरहेको छ । 

 दुई महिनाको शिशुमा पनि संक्रमण
न्युअर्लिन्स सहरमा दुई महिनाको कार्वस नाम गरेकी शिशु बाल अस्पतालमा भर्ना भएकी छन् । कार्वसलाई सास फेर्न गाह्रो भएपछि तत्कालै अस्पताल भर्ना गरिएको थियो । अहिले उनको उपचार भेन्टिलेटरमा भइरहेको छ । २४ घन्टा डाक्टर तथा नर्सहरूको निगरानीमा कार्वसको उपचार जारी छ । डाक्टरहरूका अनुसार कार्वसको स्वास्थ्य अवस्थामा त्यति सुधार आएको छैन । कोरोना भाइरस संक्रमितमध्ये कार्वस सबैभन्दा कम उमेरकी हुन् । 

यसैबीच, लुइसियानाका गभर्नर जोन बेल एडवर्ड्सले पछिल्लो चार दिनमा तीन हजार बालबालिका संक्रमित भएको जानकारी दिएका छन् । ‘यो संख्या गत एक महिनाको तुलनामा चार गुणा बढी हो,’ लुइसियानाका गभर्नर जोनले भने, ‘टेनेसी र टेक्सासका अस्पतालका आइसियू बालबालिकाले भरिएका छन् ।’ 

चार सय बालबालिकाको संक्रमणबाट निधन
क्यालिफोर्निया र न्युयोर्कजस्ता ठूला सहरमा पनि बच्चाको केस बढिरहेको छ । अहिलेसम्म अमेरिकामा कोरोना भाइरसका कारण चार सय बालबालिकाको निधन भएको एसोसिएसनले जनाएको छ । पछिल्लो २४ घन्टामा अमेरिकामा तीन हजार नौ सय ६६ जना नयाँ संक्रमित फेला परेका छन् । यस्तै, २४ घन्टामा १७ जनाले ज्यान गुमाएका छन् । अमेरिकामा अहिलेसम्म तीन करोड ९६ लाख २१ हजार तीन सय ८३ जना संक्रमित भएका छन् । जसमध्ये तीन करोड आठ लाख १२ हजार दुई सय ४३ जना निको भएका छन् ।