- वि.सं २o७८ भदौ १३ आइतबार
स्याङ्जाको गल्याङ नगरपालिका–१ राम्दी पुलनजिकैको बजारमा पहिरो खसेको छ । पहिरोले सिद्धार्थ राजमार्गछेउमा रहेका होटेल पुरिएका छन् । पुरिएको अवस्थामा रहेका चारजनाको उद्धार गरिएको घटनास्थल पुगेका गल्याङ प्रहरीचौकीका हवल्दार मदन तिमिल्सिनाले बताए । उद्धार गरिएकामध्ये एकजनाको मृत्यु भएको छ ।
मृतकको पहिचान हुन सकेको छैन । अझै केही मानिस पुरिएको हुन सक्ने आशंका गरिएको छ । पहिरोले तीनवटा घर पुरेको छ । माथिबाट ठुल्ठूला ढुंगासहित पहिरो खसेर घर पुरिएको हो ।
उद्धार गर्नसमेत कठिन भइरहेको प्रहरीले जनाएको छ । डोजरको सहायताले उद्धारको काम भइरहेको छ । सुरक्षाकर्मी र स्थानीय उद्धारमा जुटिरहेको प्रहरीले जनाएको छ । पहिरोले सिद्धार्थ राजमार्गसमेत अवरुद्ध छ ।
