काबुलबाट उद्धार भएका ११ नेपाली दिल्ली आइपुगे

अफगानिस्तानको काबुलबाट उद्धार भएका ११ नेपाली भारतको नयाँदिल्ली आइपुगेका छन् । परराष्ट्र मन्त्रालयले दिएको जानकारीअनुसार शुक्रबार नयाँदिल्ली आइपुगेका हुन् । 

काबुलका विभिन्न स्थानमा उद्धारको पर्खाइमा रहेका ४२ जना नेपाली नागरिकलाई विभिन्न ठाउँबाट एकीकृत गरी काबुल विमानस्थलनजिक राखिएको छ। विमानस्थलबाहिर जम्मा भएको भिडका कारण एकीकृत गरिएका उक्त नेपाली नागरिकलाई विमानसम्म पुर्‍याउनका लागि विभिन्न तहमा समन्वय भइरहेको पनि मन्त्रालयले जनाएको छ । 

अफगानिस्तानबाट उद्धार भई दोहा, दुबई, लन्डन र नयाँदिल्लीमा रहेका नेपालीलाई काठमाडौंसम्म ल्याउनका लागि निरन्तर समन्वय र सहजीकरण भइरहेको  पनि मन्त्रालयले जनाएको छ । काबुलमा नागरिक उड्डयन सेवाको जहाजको आगमन अवतरण हालसम्म पनि खुलिसकेको छैन।

अफगानिस्तानमा नै रहेका र आफ्नो नाम दर्ता नगराएका व्यक्ति तथा परिवारले  कन्सुलर सेवा विभागको वेबसाइटमा आफ्नो नाम दर्ता गराउन पनि मन्त्रालयले आग्रह गरेको छ ।