- वि.सं २o७७ चैत १० मंगलबार
चितवनमा निर्माणाधीन गौतमबुद्ध अन्तर्राष्ट्रिय क्रिकेट रंगशाला निर्माणका लागि मेची–महाकाली अभियान सुरु भएको छ । कञ्चनपुरस्थित महाकाली नदी तटीय क्षेत्र दोधारा–चाँदनीबाट अभियानको सुरुवात भएको हो । मंगलबार एक कार्यक्रमबीच धुर्मुस सुन्तली फाउन्डेसनद्वारा आयोजित अभियानको उदघाटन दोधारा–चाँदनी नगरका मेयर वीरबहादुर सुनारले गरे ।
मेयर सुनारले राष्ट्रव्यापी अभियानमा नगरका तर्फबाट सहयोगको प्रतिबद्धता जाहेर गरेका छन् । गौतमबुद्ध अन्तर्राष्ट्रिय क्रिकेट रंगशालाका निर्माता एव धुर्मुस सुन्तली फाउँडेशनका सञ्चालक सीताराम कट्टेलले आर्थिक अभाव भएकै कारण संकलनका लागि मेची–महाकाली अभियानको गर्नुपरेको बताए ।
सबै नेपालीलाई जोड्ने अभियान भएको बताउँदै उनले पश्चिम महाकालीदेखि पूर्व मेचीसम्म अभियान सञ्चालन गरिने बताए । ‘सबै नेपालीको चाहनाअनुरूप काम गरिरहेका छौँ,’ उनले भने, ‘साझा भावना र एकताका लागि रंगशाला निर्माणमा जुटेका हौँ ।’
खेलमैदान मात्र नभई अवलोकनका लागि समेत रंगशाला निर्माण गरिरहेको बताउँदै उनले धार्मिक, ऐतिहासिक रूपमा नेपालीलाई जोड्ने बताए । धुर्मुसले महाकाली, मेची र लुम्बिनीको माटो लिएर रंगशालामा राखिने बताए । ‘७७ वटै जिल्ला र सातै प्रदेशका छुट्टाछुट्टै स्टेडियम र सबै प्रदेशको पहिचान हुने प्रतीक पनि राख्छौँ,’ धुर्मुसले भने, ‘यो सबै नेपालीको साझा रंगशाला बन्नेछ ।’
अभियानको मूल उदेश्य आर्थिक सहयोग संकलन भएको बताउँदै उनले डिपिआरअनुरूप ३ अर्ब ५५ करोड खर्च लाग्ने बताए । गत आर्थिक वर्ष ०७६÷७७ देखि काम सुरु भएको थियो । १६ माघ ०७५ सालमा गौतमबुद्ध अन्तर्राष्ट्रिय क्रिकेट रंगशाला निर्माणका लागि धुर्मुस सुन्तली फाउन्डेसन र भरतपुर महानगरपालिकाबीच सम्झौता भएको थियो ।
अन्तर्राष्ट्रिय मापदण्डअनुरूप २२ बिघा क्षेत्रफलमा निर्माण हुने रंगशालाको काम ३० प्रतिशत सकिएको बताउँदै धुर्मुसले ४४ करोड खर्च भइसकेको बताए ।
