- वि.सं २o८१ जेठ ५ शनिबार
नेकपाको प्रचण्ड– माधव नेपाल समूहले प्रदेश २ संसदीय दलमा आफ्नो पकड बलियो रहेको दाबी गरिरहेको वेला पूर्वमाओवादी पृष्ठभूमिका ६ सांसदले केपी ओली समूहमा लागेको घोषणा गरेका छन् । बुधबार वीरगन्जमा आयोजित प्रदेश २ स्तरीय ओली पक्षमा भेलामा उनीहरू सहभागी भएका हुन् ।
धनुषाको निर्वाचन क्षेत्र नम्बर १ (ख)बाट निर्वाचित तथा तत्कालीन माओवादीका संसदीय दलका नेता रामचन्द्र मण्डलसहित ६ जना प्रचण्ड पक्षधर सांसदहरू ओलीतर्फ लागेका हुन् । मण्डलसँगै सिराहाको निर्वाचन क्षेत्र नम्बर ४(क) बाट निर्वाचित दिलीपकुमार साह, रौतहटको ३ (ख)बाट निर्वाचित कुन्दनप्रसाद कुसवाहा र बाराको ३(क)बाट निर्वाचित ज्वालाकुमारी साह ओली समूहमा लागेका हुन् ।
त्यसैगरी, पूर्वमाओवादीको कोटामा समानुपातिक प्रदेश सांसद बनेका बाराका मोहम्मद समीर र सिराहाका फुलियादेवी सदाय पनि ओली समूहमा लागेका छन् ।
नेकपाका प्रदेश २ अध्यक्ष प्रभु साह ओली समूहमा लागेसँगै उनीहरूले पनि प्रचण्ड समूहको साथ छाडेका हुन् । प्रदेश सभामा पूर्वमाओवादी पृष्ठभूमिका ११ र पूर्वएमाले पृष्ठभूमिका २१ सासद छन् ।
