- वि.सं २o७७ मङ्सिर ३० मंगलबार
सभामुख अग्निप्रसाद सापकोटा उपस्थित नभएपछि मंगलबार बिहान बोलाइएको संवैधानिक परिषद्को बैठक स्थगित भएको छ ।
प्रधानमन्त्री एवं संवैधानिक परिषद्का अध्यक्ष केपी ओलीले बोलाएकाे बैठक कोरम नपुगेपछि स्थगित भएको हो ।
बैठक आजै साँझ ५ बजे बस्ने गरी स्थगित गरिएको छ । संविधानअनुसार संवैधानिक परिषदमा ६ सदस्य रहनेछन् ।
प्रधानमन्त्री अध्यक्ष रहने परिषद्का सदस्यहरूमा प्रधानन्यायाधीश, सभामुख, राष्ट्रिय सभाका अध्यक्ष, उपसभामुख र विपक्षी दलका नेता रहनेछन् ।
परिषद्को बैठकमा कोरम पुग्नका लागि प्रधानमन्त्रीसहित पाँचजना अनिवार्य उपस्थित हुनुपर्ने संवैधानिक व्यवस्था छ ।
अहिले प्रधानमन्त्रीसहित पाँचजना मात्रै परिषदमा रहेकाले एकजना अनुपस्थित भए मात्रै पनि बैठक बस्न सक्दैन ।
प्रधानन्यायाधीश चोलेन्द्रशमशेर जबरा, राष्ट्रिय सभाका अध्यक्ष गणेशप्रसाद तिमिल्सिना र प्रमुख प्रतिपक्ष दलका नेता शेरबहादुर देउवा भने बैठकका लागि पुगेका थिए ।
अख्तियार दुरुपयोग अनुसन्धान आयोग, मानव अधिकार आयोगलगायतका विभिन्न संवैधानिक आयोगमा ४५ सिटमा नियुक्ति गर्नुपर्ने भएपछि प्रधानमन्त्री ओलीले परिषद्को बैठक बोलाएका थिए ।
आइतबार बोलाइएको बैठकमा पनि सभामखु सापकोटा र प्रमुख प्रतिपक्षी दलका नेता अनुपस्थित भएपछि बैठक सरेको थियो ।
