- वि.सं २o७७ मङ्सिर १३ शनिबार
प्रदेश सभा सभामुख, उपसभामुख र संघीय संसद्का सभामुख, अध्यक्ष, उपाध्यक्षहरूको भेलाले सरकारले तोकेको मापदण्डको पालना गर्दै संसद् सञ्चालन गर्न र कोभिड– १९ सम्बन्धी जनचेतनाका लागि नेतृत्वदायी भूमिका खेल्ने निर्णय गरेको छ ।
‘संघीय संसद् र प्रदेश सभा सञ्चालन अनुभव आदान–प्रदान एवं अन्तर्क्रिया कार्यक्रम’को शुक्रबार र शनिबार राजधानीमा भएको भेलाले उक्त निर्णय गरेको हो । कार्यक्रमको निचोडपत्रमा भनिएको छ, ‘कोभिड–१९ को महामारीमा संघीय संसद् र प्रदेश सभा सञ्चालन गर्नुपर्ने अवस्था भएकाले सरकारले तोकेको मापदण्डको पालना गर्दै सभा सञ्चालन गर्न र कोभिड– १९ सम्बन्धी जनचेतनाका लागि नेतृत्वदायी भूमिका खेल्ने ।’
त्यस्तै, उक्त भेलाले संविधानमा उल्लेखित संघ, प्रदेश र स्थानीय तहका साझा अधिकारका विषय र प्रदेश तथा स्थानीय तहको कानुन निर्माणका लागि आवश्यक रहेका संघीय कानुनहरू निर्माण गर्न सम्बन्धित पक्षको ध्यानाकर्षण गराउने पनि निर्णय गरेको छ ।
कार्यक्रमको अर्को निष्कर्ष छ, ‘प्रदेश सभाप्रति जवाफदेही र उत्तरदायी हुने गरी कर्मचारीको व्यवस्था गर्न सेवा सुविधा–सर्तसम्बन्धी छुट्टै कानुनी व्यवस्था गरी प्रदेश सभा सेवा गठनका लागि आवश्यक पहल गर्ने ।’
