- वि.सं २o७७ मङ्सिर १० बुधबार
बुधबार बसेको मन्त्रिपरिषद्को बैठकले तीन सहसचिवलाई सचिवमा बढुवा गरेको छ । प्रशासनतर्फ गोकर्णमणि दुवाडी, कृषितर्फ योगेन्द्र कार्की तथा इन्जिनियरिङतर्फ सुरेश आचार्य सचिवमा बढुवा भएका हुन् । प्रशासतर्फ सचिव भएका दुवाडी छैटाैँपटकको सिफारिसमा बढुवा भएका हुन् ।
त्यस्तै, बैठकले निजामती कर्मचारीहरूको आधिकारिक ट्रेड युनियनको निर्वाचन दोस्रोपटक स्थगन गरेको छ । २७ मंसिरका लागि चुनाव तय भएको थियो । सत्तारुढ नेकपानिकट कर्मचारी संगठनकै दबाबमा चुनाव स्थगन भएको स्रोत बताउँछ । चुनाव स्थगनको कांग्रेसनिकट नेपाल निजामती कर्मचारी युनियन (संघ)ले विरोध गरेको छ ।
बैठकले सगरमाथाको उचाइ सार्वजनिक गर्न पनि स्वीकृति दिने निर्णय गरेको एक मन्त्रीले बताए । गत वर्ष नापी विभागको टोलीले सगरमाथाको उचाइ मापन गरेको थियो ।
मन्त्रिपरिषद्ले कोभिड–१९ कारण बन्द रहेको भारत र बंगलादेशको उडान क्रमश: खोल्दै जाने निर्णय पनि गरेको छ । ‘अहिलेलाई अध्ययन गरेर हप्तामा सामान्य प्रतिनिधिमूलक हिसाबले खोल्ने निर्णय गरिएको छ’ एक मन्त्रीले भने ।
