- वि.सं २o७७ भदौ १७ बुधबार
युरिया मल खरिद गर्न चितवनका किसान कोरोनाको जोखिम मोलेर लामो समय लाइनमा बस्न बाध्य भएका छन् । धान रोपाइँ सुरु गर्नुअघि पनि युरिया मल किन्न यहाँका किसानले यस्तै हैरानी खेप्नुपरेको थियो ।
धानमा हुने झार गोडिसकेपछि उत्पादन बढाउन युरिया मल हाल्नैपर्ने किसान बताउँछन् । धानमा युरिया मल हाल्न ढिला भए पनि किसानले अहिलेसम्म मल पाएका छैनन् ।
घन्टाैँ लाइनमा बसेका किसानले समेत आवश्यकताअनुसार मल पाएका छैनन् । सहकारीले थोरै मात्र मल दिने गरेको छ । १० बजे खुल्ने चितवनको सर्वोदय बहुउद्देश्यीय सहकारीमा मल लिन किसान बुधबार बिहान ३ बजेदेखि नै बोरा लिएर लाइनमा बसेका थिए ।
चितवनको भरतपुर- ६ स्थित सर्वोदय बहुउद्देश्यीय सहकारी संस्थामा सय बोरा युरिया मल आएको छ भन्ने थाहा पाएपछि उनीहरू बिहान ३ बजेदेखि नै लाइनमा बसेका हुन् ।
मल खरिद गर्ने किसानको भिड धेरै भएपछि सहकारीले प्रतिकिसान १० केजी मल वितरण गर्ने तयारी गरेको सहकारीका अध्यक्ष प्रेमराज कोइरालाले बताए ।
यो प्रतिनिधि घटना मात्र हो । जिल्लाका अन्य ठाउँमा पनि घाममा दिनभर लाइनमा बस्दा किसानले मल पाएका छैनन् । कृषि ज्ञान केन्द्र चितवनका प्रमुख राजन ढकालका अनुसार जिल्लामा २७ हजार चार सय ४५ हेक्टरमा धान खेती हुँदै आएको छ । अहिले जिल्लाभरि जम्मा दुई हजार एक सय क्विन्टल मात्र मल आएको छ । एक कट्ठा जमिनलाई साढे दुई केजी युरिया आवश्यक पर्ने ढकालले बताए ।
