सनराइजद्वारा वेद विद्याश्रमलाई सवा दुई लाख सहयोग
सनराइज बैंक लिमिटेडले बुढानीलकण्ठ वेद विद्याश्रमलाई सहयोग रकम प्रदान गरेको छ । बैंकले विद्याश्रमका छात्रहरूलाई कठिनाइ भएको र आर्थिक सहयोगको आवश्यकता परेको जानकारी प्राप्त भएपछि सहयोग गरेको हो ।
बुढानीलकण्ठ नगरपालिकाका मेयर उद्धवप्रसाद खरेल र बैंकका प्रमुख कार्यकारी अधिकृत जनक शर्मा पौड्यालले संयुक्त रूपमा २ लाख २५ हजार रुपैयाँको चेक प्रदान गरेको बैंकले जनाएको छ ।
साथै, पूजासामग्री, दाल, चामल, गेडागुडी गहुँ, पिठो, तेल आदि खाद्य सामग्री बुढानीलकण्ठ मन्दिरका मठाधीश स्वामी निगमानन्दलाई हस्तान्तरण गरेको जनाइएको छ । देव भाषा, धर्म, संस्कृत, परम्पराको संरक्षण आदिबारे शिक्षा प्रदान गर्दै आएको बुढानीलकण्ठ वेद विद्याश्रममा ३५ जना विद्यार्थी बसोवास गर्दै आएका छन् ।