गौशालाका सुकुमबासीले भने, ‘सरकारले ठिक काम गर्यो, सरकारी जग्गा खाली गर्नुपर्छ'
गौशालाका सन्तलाल साह गौचरन मिचिएकोमा चिन्तित थिए। आँखै अगाडि तीन सयभन्दा बढी गाईका बथान देखेका ७० वर्षीय साहले अतिक्रमणमा परेको जग्गा फिर्ता होला भन्ने आस मारिसकेका थिए । ‘पहिला गौशालामा गाईका बथानले भरिभराउ हुन्थे, विस्तारै अतिक्रमणको चपेटामा प-यो । पहिला जस्तो अहिले गाई पनि छैनन् । करिब डेढ सय गाई थिए । ती पनि अर्को स्थानतिर लगिएको छ,’ उनले भने ।
यहाँका जग्गा अतिक्रमण गरी घरटहराले भरिभराउ थिए । सरकारी जग्गा फिर्ता गर्ने अभियानले स्थानीयको मुहारमा खुसी छायो ।
स्थानीयवासी राकेशकुमार सिंह घरजग्गा भएका समेतले अतिक्रमण गरेर बनाएको गौशालाका जग्गा फिर्ता गर्ने सरकारको अभियान राम्रो भएको बताउँछन् । ‘सरकारले ठीक काम गरेको छ, सरकारी जग्गा खाली गर्नुपर्छ, अतिक्रमित हुनुहुँदैन’, सिंहले भने ।
स्थानीयवासी अनिता यादव र मञ्जुकुमारी मण्डलकोे वास्तविक गरिब परिवारको पहिचान गरी बसोबासको व्यवस्था सरकारले गरिदिएहुन्थ्यो भन्ने चाहना छ ।‘घरजग्गा भएकाले पनि अतिक्रमण गरेर बनाएका जग्गा फिर्ता हुनु खुसीको कुरा हो, वास्तविक गरिब तथा सुकुमबासीको उचित बसोबासको व्यवस्था होस्’, दुवैले एकै स्वरमा भने ।
गत आइतबार अपराह्न भूमि व्यवस्था, सहकारी तथा गरिबी निवारणमन्त्री पद्माकुमारी अर्याललाई स्थानीयवासीले तालीले स्वागत मात्रै गरेनन्, वर्षौंदेखि अतिक्रमणमा परेको जग्गा फिर्ता भएकामा खुसी व्यक्त गरे । तीनवटा डोजर लगाएर अतिक्रमित घरटहरा भत्काइएको थियो। मन्त्रालयले पछिल्लो समय सरकारी जग्गामा बनेका घरटहरा भत्काइ जग्गा फिर्ता गराउने अभियान सञ्चालन गर्दै आएको छ ।
सोहीक्रममा यहाँका घरटहरा भत्काइएको हो। मन्त्री अर्यालले सो अवसरमा कोही पनि सुकुमबासी र भूमिहीन अन्यायमा नपर्ने जानकारी दिइन् । गौशाला नगरपालिकास्थित निगोन गौशालाको नाममा रहेको सरकारी जग्गा फिर्ताभएको घोषणा गर्दै उनले वास्तविक सुकुमबासीको व्यवस्थापन हुने जानकारी दिए । ‘
भूमिहीनको समस्या भूमि ऐन आठौँ संशोधनमार्फत हुन्छ, कोही सुकुमबासी अन्यायमा पर्नु हुँदैन’, उनले भने।
मन्त्री अर्यालले पछिल्लो समय अतिक्रमित सरकारी र सार्वजनिक गुठीको जग्गा फिर्ताको अभियानलाई तीव्रता दिएकी छन् । यही क्रममा उनले गौशालाको नाममा रहेको अतिक्रमित जग्गा फर्काएकी थिइन् ।
एक वर्षदेखि यहाँको सरकारी जग्गा संरक्षण गर्ने अभियान सुरु भएको थियो । गौशाला जग्गामा बसोबास गर्दै आएकालाई स्थानीय प्रशासन र नगरपालिकाले घरटहरा खाली गर्न पटक पटक पत्राचार तथा सार्वजनिक सूचना टाँस गरेको थियो ।
ती स्थानमा बसोबास गरेकाले घरटहरा नछाडेपछि डोजर लगाएर भत्काइएको थियो। गौशालाका नाममा रहेको १ सय ४८ बिघा सरकारी जग्गामध्ये करिब १५ कट्ठा जग्गामा बनाइएको ३० वटा घरटहरा भत्काइएको थियो ।
राष्ट्रिय सहकारी विकास बोर्डको स्वामित्वमा रहेको करिब २ सय बिघा जग्गा घट्दै गएर हाल १ सय ४८ बिघा जग्गा सीमित भएको छ । गौशालालाई संरक्षण गरी उद्योग तथा कृषि फार्म सञ्चालन गर्ने सो बोर्डले जनाएको छ ।