रोल्पामा यात्रुवाहक बस दुर्घटना हुँदा १४ जना घाइते भएका छन्। जसमा पाँचजनाको अवस्था गम्भीर छ ।
रोल्पाको त्रिवेणी गाउँपालिका वडा नं. ७, गाइबिसौना स्थित घोराही–घर्तीगाउँ सहिद मार्ग खण्डमा बुधबार दिउँसो घर्तीगाउँदेखि काठमाडौंतर्फ जाँदै गरेको लु २ ख २९६६ नम्बरको बस दुर्घटना भएको हो।
चालकसहित २५ जना सवारमा १४ जना घाइते भएका छन्। माडी २ की २५ वर्षिय जुनमाया पुनमगर, त्रिवेणी ७ का १९ वर्षिय अम्मर झाँक्री, परिवर्तन २ का ३९ वर्षीय रामबहादुर घर्तीमगर, रोल्पा ३ की २५ वर्षीया मनिया विक गम्भीर घाइते भएका छन्। त्यस्तै, दाङको घोराही १६ की ५० वर्षिया सुनीता बुढामगर मध्यम घाइते भएकी छिन्।
परिवर्तन ४ की ४५ वर्षीया मीरा बुढा, माडी २ का २९ वर्षीय विशाल परियार, माडी ५ की २९ वर्षीया शर्मिला घर्ती, माडी २ का २६ वर्षीय चन्द्रवीर पुन, रोल्पा नगरपालिका ७ का ४० वर्षीय टेकबहादुर सार्की, परिवर्तन ४ का १७ वर्षीय शिवशक्ति बुढामगर, परिवर्तन ३ का २३ वर्षीय विशाल डाँगी र माडी २ की ६८ वर्षीया भीमा पुन सामान्य घाइते भएका छन्।
रोल्पाका डिएसपी पंचबहादुर बाखुका अनुसार गाडीका चालक चन्द्रवीर पुन पनि सामान्य घाइते भएका छन्। गम्भीर घाइतेलाई उपचारका लागि दाङ पठाइएको उनले बताए।
