- वि.सं Invalid date format
विभागीय टोली सशस्त्र प्रहरी बलको एपिएफ क्लब धनकुटामा जारी १७औं संस्करणको सहिद भीमनारायण गोल्डकपको सेमिफाइनलमा प्रवेश गरेको छ।
धनकुटा सदरमुकामस्थित तल्लो टुँडिखेलमा आज सम्पन्न प्रतियोगिताको अन्तिम क्वाटरफाइनलमा मोरङको बेलबारी फुटबल क्लबलाई ३–२ गोलअन्तरले पराजित गर्दै एपिएफ सेमिफाइनलमा पुगेको हो। एपिएफको जितमा कप्तान हरि कार्कीले ७औं मिनेटमा र युवराज खड्काले ३३ औं मिनेटमा गोल गरेका थिए।
बेलबारीको तर्फबाट भुवन बस्नेतले ३६औं मिनेटमा र ड्यानियलले ४६औं मिनेटमा गोल गर्दै खेललाई २–२ को बराबरीमा पुर्याएका थिए। खेलको अन्त्यतिर ९२औं मिनेटमा बेलबारीका विकु राईले आत्मघाती गोल गर्दा एपिएफ भाग्यमानी सावित हुँदै सेमिफाइनल प्रवेश गरेको हो। खेलको म्यान अफ द म्याच एपिएफका युवराज खड्का घोषित भए।
आजको खेलसँगै प्रतियोगिताको सेमिफाइनल समिकरण पूरा भएको छ। फाइनल प्रवेशको लागि एपिएफले कोशी प्रदेश लिग विजेता उदयपुरको गाइघाट फुटबल क्लबसँग शुक्रबार प्रतिस्पर्धा गर्नेछ।
भोलि बिहीबार साविक विजेता विर्तामोड युनाइटेड क्लब र सप्तरीको नमोबुद्ध युथ क्लबले फाइनल प्रवेशका लागि प्रतिस्पर्धा गर्ने प्रतियोगिताका संयोजक शम्भु प्रधानले बताए।
