लुम्बिनीमा विपतबाट साउनयता १८१ जनाको मृत्यु, चैतमा मात्रै आठजनाको ज्यान गयो

लुम्बिनी प्रदेशमा विपतका घटनाबाट चालू आर्थिक वर्षमा १८१ जनाले ज्यान गुमाएका छन् । यहाँ ०८१ साउनदेखि चैत १९ गतेसम्म विपतका ९३६ घटना भएका छन् । आन्तरिक मामिला तथा कानुन मन्त्रालयका अनुसार घटनामा १२५ पुरुष र ५६ जना महिलाले ज्यान गुमाएका छन् । ४२० जना घाइते छन् भने १४ जना बेपत्ता छन् । धेरै घटना बर्दिया जिल्लामा भएका छन् । धेरै मानवीय क्षति कपिलवस्तुमा भएको छ ।

बर्दियामा १३० घटनामा परी ३० जनाको ज्यान गएको छ । दाङमा १११ घटनामा २८ जनाको मृत्यु भएको छ । त्यस्तै, रुपन्देहीमा ९९ घटनामा २४ जनाको मृत्यु भएको छ भने कपिलवस्तुमा ८८ घटनामा परी ३३ जनाले ज्यान गुमाएका छन् ।

यो अवधिमा धेरै मृत्यु पानीमा डुबेका घटनाबाट भएको छ । १२७ वटा घटना भएकोमा ११२ जनाको पानीमा डुबेर मृत्यु भएको छ । त्यस्तै, आगलागीका ३४२ घटना भएकोमा ११ जनाको मृत्यु भएको छ । सर्पदंशका १०८ घटना भएकोमा १० जनाको मृत्यु भएको तथ्यांक मन्त्रालयले राखेको छ ।

चैतमा १९ दिनमा आगलागीका ८५ घटना
यही चैत महिनामा मात्रै लुम्बिनी प्रदेशमा आगलागीका ८५ घटना भएका छन् । यी घटनामा परी एकजनाको ज्यान गएको छ भने १० जना घाइते भएका छन् । ६१ घर जलेका छन् भने दुई करोड ५४ लाखबराबरको क्षति भएको छ। चैत महिनामा पानीमा डुबेर सातजनाको ज्यान गएको छ।

प्रदेश विपत् व्यवस्थापन परिषद्को बैठक
लुम्बिनी प्रदेश विपत् व्यवस्थापन परिषद्को बैठक मंगलबार सम्पन्न भएको छ । बैठकमा विभिन्न ११ वटा एजेन्डामा छलफल गरिएको छ। बैठकमा आन्तरिक मामिला तथा कानुन मन्त्रालयका विपत् फोकल पर्सन गंगाधर पाण्डेले विपतको पछिल्लो तथ्यांक प्रस्तुत गरेका थिए।

बैठकले पाल्पाको पर्यटकीय गन्तव्य रानीमहलको नदी कटान संरक्षण, तानसेनको सुकुमवासी बस्ती सुरक्षा, बाँकेको राप्ती नदी कटान जोखिम न्यूनीकरण, कर्णाली नदीको बर्दिया राष्ट्रिय निकुञ्जसँग जोडिएको क्षेत्रमा सिँचाइको काम अघि बढाउन बजेट छुट्याउने निर्णय गरेको छ । लुम्बिनी प्रदेश बहुप्रकोपको जोखिममा रहेको छ। प्राकृतिक रूपमा भूकम्प, बाढी, पहिरो, चट्याङ, असिना, हुरी, अतिवृष्टिको जोखिम छ । गैरप्राकृतिक रूपमा महामारी, आगलागी, जल दुर्घटना, सडक तथा औद्योगिक दुर्घटनाको जोखिम रहेको छ।

प्रमुख जिल्ला अधिकारीहरूले विपत् पूर्वतयारीबारे बैठकमा जानकारी गराएका छन्। बैठकमा मुख्यमन्त्री चेतनारायण आचार्यले प्रभावकारी विपत् व्यवस्थापनका लागि क्षति न्यूनीकरणमा सबैको ध्यान जान जरुरी रहेको बताए । बैठकमा स्वास्थ्यमन्त्री खेमबहादुर सारू, प्रदेश सभा सदस्य इन्द्रजित थारू, प्रमुख सचिव बाबुराम अधिकारीलगायतले सम्बोधन गर्दै विपत् व्यवस्थापनको कामलाई प्रभावकारी बनाउन समुदाय, सुरक्षा निकाय र सरकारको बिचमा सहकार्यमा जोड दिएका थिए।