स्पेनिस प्रशिक्षकले नेपाली स्क्वास खेलाडीलाई प्रशिक्षण दिने

विश्व स्क्वास वरीयताको पाँचौँ स्थानमा रहिसकेका स्पेनिस बोर्खा गोलानले नेपाली खेलाडीलाई एक साता प्रशिक्षण दिने भएका छन् । १७ पटकका स्पेनको राष्ट्रिय च्याम्पियन भएका गोलानले नेपालका सिनियर तथा युवा स्क्वास खेलाडीलाई प्रशिक्षण दिने नेपाल स्क्वास एन्ड र्‍याकेट्स संघले जनाएको छ । संघले सोमबार एक कार्यक्रमबिच स्पेनका लेभल थ्री प्रशिक्षक गोलानलाई स्वागत गरेको छ । 

सन् २०१४ मा गोलान विश्व स्क्वास वरीयतामा पाँचौँ स्थानमा रहेका थिए । स्पेनका राम्रा स्क्वास खेलाडीमा गनिने गोलानले पिएसए विश्व टुरमा ३३ उपाधि जितेका छन् । अन्तर्राष्ट्रिय करिअरमा उनले दुईपटक युरोपेली व्यक्तिगत च्याम्पियनसिप ट्रफी जितेका थिए । सन् २०२३ मा अन्तर्राष्ट्रिय खेलबाट सन्न्यास लिएका गोलानले स्पेनको राष्ट्रिय टोलीलाई विभिन्न अन्तर्राष्ट्रिय प्रतियोगतामा प्रशिक्षण दिएका छन् । 

संघका अध्यक्ष ध्रुबबहादुर गुरुङले गोलानको प्रशिक्षणले नेपाली स्क्वास खेलाडीको स्तर अझ राम्रो हुने बताए । ‘विश्वस्तरीय खेलाडीको प्रशिक्षणबाट नेपालका खेलाडीले केही सिक्न अवसर पाउनेछन्,’ गुरुङले भने, ‘हाम्रा खेलाडीले धेरैभन्दा धेरै अनुभव लिन सक्नुपर्छ ।’ संघका निवर्तमान अध्यक्ष किशोर महर्जनले विश्व वरीयताको शीर्ष पाँचभित्र परिसकेका गोलानबाट खेलाडीले मात्र नभएर नेपाली प्रशिक्षकले पनि सिक्नुपर्ने बताए । 

‘अन्तर्राष्ट्रियस्तरमा उपाधि जितेका तथा विश्व वरीयताको पाँचौँ स्थानसम्म पुगेका व्यक्तिबाट खेलाडीले मात्र नभएर हाम्रा प्रशिक्षकले पनि उहाँबाट अनुभव लिनुपर्छ,’ महर्जनले भने । ललितपुर जिल्ला खेलकुद विकास समितिका अध्यक्ष विनोद महर्जनले गोलानको आगमन नेपालका स्क्वास खेलाडीका लागि आफ्नो खेल स्तर बढाउने ठुलो अवसर भएको बताए ।

आफ्नै नाममा  गोलान एकेडेमी
स्पेनिस स्क्वास प्रशिक्षक गोलानले दुई वर्षअघि सन्न्यास घोषणा गर्दा राम्रो फर्ममा थिए । उनले सन्न्यासपछि स्पेनमै गोलान स्क्वास एकेडेमीको स्थापना गरेका थिए । यस एकेडेमीमा नेपालका स्क्वास खेलाडी अमृत थापामगरले पनि प्रशिक्षण गरिरहेका छन् । ४२ वर्षीय प्रशिक्षक गोलानले नेपालको बारेमा धेरै सुनेको बताए । ‘मैले नेपाल र यहाँका खेलाडीहरूका बारेमा सुनेको थिएँ, नेपाली स्क्वास खेलाडीलाई थप उत्प्रेरित गर्ने लक्ष्यसहित आएको हुँ,’ उनले भने । 

सन् २०१४ को सिजनमा उनी उत्कृष्ट लयमा थिए । यसबिच कोलम्बिया ओपनमा सहभागिता जनाउने क्रममा उनको घुँडामा चोट लागेको थियो । जसका कारण उनी सक्रिय खेलबाट ६ महिना बाहिर रहे । सोही वर्ष नै उनी विश्व वरीयताको पाँचौँ स्थानमा पुगेका थिए । सन् २०१३ को सिजनमा उनी कतार ओपन क्लासिकको सेमिफाइनलमा पुगे । सो प्रतियोगिताको क्वार्टरफाइनलमा उनले शीर्ष वरीयताका जर्जयो गुल्टरविरुद्ध रोमाञ्चक जित निकालेका थिए । हङकङ ओपनजस्तो विश्व चर्चित स्क्वास ओपनको उपविजेता रहिसकेका गोलानले पहिलोपटक पिएसए विश्व सिरिजमा स्थान बनाएका थिए ।