- वि.सं २o८१ चैत २३ शनिबार
सगरमाथा घुम्न आएका करिब डेढ सय विदेशी पर्यटक मौसम खराब हुँदा रामेछापको मन्थलीमै रोकिएका छन् । बिहीबार बिहानदेखि मौसम खराब हुँदा पाँच सय पर्यटक मन्थलीमा रोकिएका थिए । तर, शुक्रबार मौसम खुलेसँगै हेलिकोप्टरका ५० र जहाजका सात उडानमार्फत तीन सय ६० पर्यटक लुक्का र फाप्लुतिर प्रस्थान गरेका छन् । बाँकी पर्यटक भने रामेछाप विमानस्थल, मन्थलीमै रोकिएका छन् ।
बिहीबार बिहान रामेछाप विमानस्थलबाट विभिन्न निजी हवाई कम्पनीले पाँचवटा उडान गरेका थिए । उडान हुँदाहुँदै एकाएक लुक्लाको मौसम खराब हुन पुग्यो, जसका कारण उडान प्रभावित बनेको नागरिक उड्डयन प्राधिकरण रामेछापका एटिसी सञ्जय श्रेष्ठले जानकारी दिए । शुक्रबार बिहानसम्म पनि मौसम नखुुलेपछि केही पर्यटक हेलिकोप्टर चार्टर गरेर लुक्ला र फाप्लुु गएका थिए भने केही पर्यटक सडकमार्ग हुँदै गाडी रिजर्भ गरेर फाप्लुतर्फ लागेका थिए । तर, पुनः मौसम खुलेसँगै पर्यटक गन्तव्यतिर लागेका छन् ।
काठमाडौं विमानस्थलमा बढी चाप भएपछि नागरिक उड्डयन प्राधिकरणले लुक्ला र फाप्लु जाने जहाज रामेछाप विमानस्थलबाट उडान गर्ने गरी व्यवस्था गरेको छ । जसअनुसार लुक्ला र फाप्लु जाने पर्यटक राजधानीमा रहेका विभिन्न ट्राभल एजेन्सीमार्फत सवारीसाधनमा बिपी राजमार्ग हुँदै रामेछाप विमानस्थल आइपुुग्ने गरेका छन् । सगरमाथा क्षेत्र घुम्न आउने समयमा रामेछाप विमानस्थलबाट चैतदेखि जेठसम्म र असोजदेखि १५ मंसिरसम्म निजी वायु कम्पनी तारा, समिट र सीता एयरलाइन्सले पर्यटकलाई सेवा दिँदै आएका छन् ।
