- वि.सं २o८१ चैत २३ शनिबार
भरतपुर महानगरपालिकाले दोस्रो चौमासिकमा बजेटको ३६.४९ प्रतिशत खर्च, लक्ष्यको ४३ प्रतिशत राजस्व संकलन गरेको छ । महानगरले आर्थिक वर्ष ०८१/८२ को दोस्रो चौमासिकमा भएका कार्यको सार्वजनिक सुनुवाइ गर्दै यस्तो बताएको हो । दोस्रो चौमासिक प्रगति प्रतिवेदन पेस गर्दै महानगरका प्रमुख प्रशासकीय अधिकृत लक्ष्मीप्रसाद पौडेलले चालू आवका लागि ६ अर्ब ५६ करोड एक लाख ४३ हजार रुपैयाँ विनियोजन गरिएको र त्यसमध्ये एक अर्ब ९९ करोड खर्च भएको बताए । यो बजेटको ३६ दशमलव ४९ प्रतिशत हो । त्यस्तै, एक अर्ब ८० करोड राजस्व संकलनको लक्ष्य लिएकोमा दोस्रो चौमासमा ७७ करोड १७ लाख ५४ हजार एक सय ३७ रुपैयाँ संकलन गरेको छ, जुन लक्ष्यको ४३ प्रतिशत रहेको उनको भनाइ छ ।
महानगरपालिकाका प्रमुख प्रशासकीय अधिकृत पौडेलले चार महिनाको प्रगति प्रतिवेदन प्रस्तुत गरेका थिए । दोस्रो चौमासिकमा गौतम बुद्ध रंगशाला, महानगर प्रशासकीय भवन, पुंगी खोला, सिटीहल, केरुंगा नाला सौन्दर्यकरण, मेसजाली फाउन्डेसन, ६ लेन सडक, फोहोरमैला व्यवस्थापन, उज्यालो भरतपुर कार्यक्रमलगायतको प्रगति विवरण प्रस्तुत गरे ।
कार्यक्रममा नागरिकलाई प्रश्नको उत्तर दिँदै महानगर प्रमुख रेणु दाहालले भरतपुरमा अल्पकालीन, मध्यकालीन र दीर्घकालीन महŒवका योजना एकसाथ अघि बढाएको उल्लेख गरिन् । उनले अबको बाँकी कार्यकालमा धेरै काम अगाडि बढ्ने र भरतपुरवासीलाई सन्तुष्ट बनाउने प्रयासमा महानगर अघि बढ्ने आश्वासन दिलाइन् । महानगरका उपप्रमुख चित्रसेन अधिकारीले महानगरले योजनाबद्ध र सन्तुलित विकासको नीतिलाई अवलम्बन गर्दै दिगो र आत्मनिर्भर विकासको पक्षमा काम अगाडि बढाइरहेको बताए ।
