- वि.सं २o८१ चैत ६ बुधबार
चीनको सिचुवान एयरलाइन्सको न्यारोबडी विमानले मंगलबारदेखि छेन्दुबाट पोखरा र पोखराबाट छेन्दु रुटमा व्यावसायिक चार्टर उडान सुरु गरेको छ । सिचुवानले तीन महिना साताको एक दिन नियमित व्यावसायिक चार्टर उडान गर्ने भएको हो ।
छेन्दुबाट मंगलबार एक सय २८ यात्रु लिएर १० बजे पोखरा आएको एयरबस–३९१ विमानले पोखराबाट मेयर धनराज आचार्यको नेतृत्वमा एक सय २५ जना यात्रु लिएर १२ बजे छेन्दुतर्फ उडेको थियो । चीनबाट सिचुआन प्रान्तका सरकारी अधिकारी, पर्यटन व्यवसायी, विभिन्न संघ–संस्थाका प्रतिनिधि, पत्रकारलगायत आएका छन् ।
त्यस्तै, पोखराबाट मेयर आचार्यसँगै पर्यटन बोर्ड गण्डकी प्रदेश कार्यालयका प्रमुख मणि लामिछाने, पोखरा पर्यटन परिषद्का अध्यक्ष तारानाथ पहारीसँगै पर्यटन व्यवसायी र पत्रकारहरू रहेका छन् ।
पोखराबाट १९ चैतमा हुने अर्को उडानमा उद्योगी–व्यवसायीको टोली र २ वैशाख ०८२ मा हुने अर्को उडानमा विभिन्न संघ–संस्थाको टोली छेन्दु पुग्नेछन् । पोखरा आउने र छेन्दु जानेहरूका लागि सात रात आठ दिनको प्याकेज बनाइएको पोखरा पर्यटन परिषद्का अध्यक्ष तारानाथ पहारीले जानकारी दिए ।
