दयाहाङको मुख्य भूमिका रहने ‘मितज्यू’बाट नेपाली सिनेमामा डेब्यु गर्दै तेरिया

अनिल बुढामगरको निर्देशनमा निर्माण हुने सिनेमा ‘मितज्यू’को मुख्य भूमिकामा अभिनेता दयाहाङ राई र अभिनेत्री तेरिया फौजामगर अनुबन्धित भएका छन्। भारतीय रियालिटी साे ‘डान्स इन्डिया डान्स लिल मास्टर्स’को सिजन ३ र ‘झलक दिखलाजा’ सिजन ९ की विजेता मगरले नेपाली रजतपटमा डेब्यु गर्न लागेकी हुन्।

यसअघि तेरियाले सन् २०२२ को भारतीय वेब सिरिज ‘उनकी यारी’ र सन् २०२३ को ‘क्याम्पस बिट्स’जस्ता वेब सिरिजमा अभिनय गरेकी थिइन्। उनको प्रवेशसँगै सिनेमाको चर्चा बढ्ने देखिन्छ। जनक घर्तीमगरको लगानीमा निर्माण हुने सिनेमाका लागि दयाले दोस्रोपटक सहकार्य गर्न लागेका हुन्। उनीहरूले यसअघि यस वर्षको सुपरहिट सिनेमा ‘घरज्वाइँ’मा काम गरेका थिए।

जिएम मुभिज प्रोडक्सन र एबिएम सिने प्रोडक्सनको ब्यानरमा सिनेमा निर्माण हुनेछ। अर्को वर्ष छायांकन हुने सिनेमामा दयाहाङ र तेरियाबाहेक अन्य कलाकार को–को रहने भन्ने निर्माण टिमले सार्वजनिक गरेको छैन।

आगामी वर्षको चैत २७ गतेलाई सिनेमाको प्रदर्शन मिति घोषणा भइसकेको छ। महेश राईको लेखन रहेको सिनेमाका प्रोडक्सन कन्ट्रोलर धनबहादुर राई हुन्।