- वि.सं २o८१ माघ २८ सोमबार
कार्टुनिस्ट रवि मिश्रले बाल कथासंग्रह ‘दिव्याको क्रिस्टल बल’ ल्याएका छन् । नयाँ पत्रिकाकर्मी मिश्रको ‘दिव्याको क्रिस्टल बल’, अस्मिता वादीको ‘जुन र किरी’, अनामिका गौतमको ‘इभा मख्ख, आमाबुबा छक्क’, दीपमाला महर्जनको ‘स्मार्ट आद्या’ र रेणुका जिसीको ‘चमत्कारी घडी’ आइतबार राजधानीमा लोकार्पण गरिएको हो ।
सांग्रिला बुक्स र रुम टु रिड नेपालको सहकार्यमा तयार भएका चित्र पुस्तकहरू अनुदिता बस्नेत, आद्याश्री पौडेल, देवांश आर भट्टराई, मारिया काफ्ले र सर्वज्ञ पौड्यालले सामूहिक रूपमा लोकार्पण गरेका हुन् ।
सामाजिक मनोविज्ञानमा आधारित कथाहरूमा अनामिका गौतम, प्रज्वल थापामगर, रवि मिश्र र सरिष्मा अच्छामीले चित्र बनाएका छन् । नेपाली र अंग्रेजी भाषामा प्रकाशित पुस्तकको अंग्रेजी अनुवाद अवनी गिरीले गरेका हुन् ।
लेखक मिश्रका अनुसार ‘दिव्याको कृस्टल बल’ बालबालिकाको सामाजिक मनोविज्ञानसँग सम्बन्धित कथाको सँगालो हो । पुस्तकमा कृस्टल बलसँगको उसको भावनात्मक र त्यो बल जोगाउन उसले खेपेको हैरानीको कथा छ । यसमा कथासँगै चित्रहरू पनि समावेश गरिएका छन् ।
