आइसिसीको ड्रिम ११ मा नेपालकी पूजा

भारतले लगातार दोस्रोपटक आइसिसी महिला यू–१९ विश्वकप क्रिकेट प्रतियोगिता जितेको छ । आइसिसीले विश्वकपभरि उत्कृष्ट प्रदर्शन गर्ने खेलाडी समेटेर ड्रिम ११ टोली घोषणा गरेको छ । ड्रिम ११ मा नेपालकी कप्तान पूजा महतोले पनि स्थान बनाएकी छिन् । सुपर ६ मा नपुगेका राष्ट्रमध्येबाट उनले मात्र स्थान सुरक्षित गरेकी हुन् । ड्रिम ११ मा च्याम्पियन भारतबाट सर्वाधिक चार र उपविजेता दक्षिण अफ्रिकाबाट दुई खेलाडी छनोट भएका छन् । नेपालकी पूजालाई अलराउन्डर खेलाडीका रूपमा आइसिसीले राखेको छ । दक्षिण अफ्रिकाकी कायलालाई कप्तानी जिम्मेवारी दिएको ड्रिम ११ मा १२औँ खेलाडीमा दक्षिण अफ्रिकाकी निनी रहेकी छिन् ।

१. त्रिषा गोन्गाडी (भारत)
रनः ३०९, औसत : ७७.२५, उच्च : १००

भारतले लगातार दोस्रोपटक यू–१९ विश्वकप ट्रफी उचाल्दा ब्याटिङमा त्रिशाले उत्कृष्ट प्रदर्शन गरेकी थिइन् । विशेषतः उनले फाइनलमा अलराउन्ड प्रदर्शन नै गरेकी थिइन् । ब्याटिङ गर्ने क्रममा उनले ३३ बलमा ४४ रनको योगदान गरिन् । साथै, बलिङ इनिङ्समा उनले १५ रन खर्चेर दक्षिण अफ्रिकाविरुद्ध तीन विकेट लिइन् । यसै असाधारण प्रदर्शनका कारण उनी प्रतियोगिताकै म्यान अफ दी सिरिज भइन् । आइसिसीको ड्रिम ११ मा त्रिषा ओपनरका रूपमा रहेकी छिन् ।

२. जेमा बोथा (द.अफ्रिका)
रनः १०५, औसत : २६.२५, उच्च : ३७

आइसिसीको ड्रिम ११ मा त्रिषाको ओपनिङ जोडीका रूपमा दक्षिण अफ्रिकाकी जेमा रहेकी छिन् । जेमाले सेमिफाइनलमा अस्ट्रेलियाविरुद्ध विस्फोटक ब्याटिङ गरेकी थिइन् । दक्षिण अफ्रिकाले १०६ रनको लक्ष्य पछ्याउँदा उनले २४ बलमा ३७ रनको योगदान गरिन् । जसमा चार चौका र दुई छक्का उनले प्रहार गरेकी थिइन् ।

३. डाभिना पेरिन (इंग्ल्यान्ड)
रनः १७६, औसत : ३५.२०, उच्च : ७४

योपटक इंग्ल्यान्डले फाइनल स्थान बनाउन सकेन । तर, उसका शीर्ष क्रमका खेलाडी निकै चलेका थिए । डाभिनाले प्रत्येक खेलमा इंग्ल्यान्डका लागि गतिलो योगदान दिइन् । क्रिजमा आक्रामक रूपमा प्रस्तुत हुने उनले अमेरिकाविरुद्ध दमदार प्रदर्शन गरेकी थिइन् । डिभानाले अमेरिकाविरुद्ध केबल ४५ बलमा ७४ रनको योगदान गरेकी थिइन् । आइसिसीको टोलीमा उनले तेस्रो क्रम ब्याटिङ जिम्मेवारी पाएकी छिन् ।

४. कामालिनी जी (भारत)
रनः १४३, औसत : ३५.७५, उच्च : ५६

भारतकी कामालिनीले कहिले पनि ओपनिङ गरेकी छैनन् । तर, उनको क्षमताअनुसार सहजै ओपनिङ पनि गर्न सक्छिन् । कामालिनीलाई मनपर्ने स्थान नै मध्यक्रम हो । उनले सेमिफाइनलमा साबिक उपविजेता इंग्ल्यान्डविरुद्धको ५६ रन बनाउँदा भारतले लगातार दोस्रोपटक फाइनल स्थान सुरक्षित गरेको हो । स्कटल्यानडविरुद्ध भारतले १५० रनको फराकिलोअन्तरले जित निकाल्दा उनले अर्धशतकीय इनिङ्स खेलेकी थिइन् ।

५. काओमिहे ब्राय (अस्ट्रेलिया)
रनः ११९, औसत : २९.७५, उच्च : ४५

आइसिसीको ड्रिम ११ मा अस्ट्रेलियाकी १५ वर्षीया काओमिहेले मध्यक्रम स्थान पाएकी छिन् । प्रतियोगिताको सेमिफाइनलमा दक्षिण अफ्रिकाविरुद्ध अस्ट्रेलियाबाट सर्वाधिक रन प्रहार गर्ने उनी मात्र हुन् । उनले ३६ रन बनाएकी थिइन् । ब्याटिङमा मात्र नभएर उनले अस्ट्रेलियाका लागि अलराउन्ड प्रदर्शन गरेकी थिइन् । काओमिहेले बलिङमा सात विकेट हात पारेकी थिइन् । उनलाई अलराउन्डर खेलाडीका रूपमा हेरिएको छ ।

६. पूजा महतो (नेपाल)
रनः ७०, उच्च : २७, बलिङ : ९ विकेट, उत्कृष्ट ४/९

यू–१९ विश्वकपमा नेपालले १३औँ स्थान हात पारेको थियो । नेपाल सुपर ६ मा पुग्न नसके पनि कप्तान पूजाले असाधारण खेल प्रस्तुत गरेकी थिइन् । प्ले अफ चरणसम्म उनी प्रतियोगिताकै सर्वाधिक विकेट लिने बलर थिइन् । नेपालले प्रतियोगितामा एक मात्र जित निकाल्दा पूजाले नै उत्कृष्ट प्रदर्शन गरेकी थिइन् । एक किसिमले नेपालको आशा उनी मात्र थिइन् । उनले ब्याटिङ, बलिङ र फिल्डिङमा प्रेरणादायी प्रदर्शन गरेकी थिइन् । यसै कारण उनी अलराउन्डर खेलाडीका रुपमा आइसिसीको ड्रिम ११ मा स्थान बनाउन सफल भएकी हुन् । समूह चरणबाटै बाहिरिएका राष्ट्रबाट पूजाले मात्र आइसिसीको टोलीमा स्थान बनाएकी हुन् । उनले ब्याटिङमा ७० रन तथा बलिङमा नौ विकेट लिइन् ।

७. कायला रेनेके (कप्तान), (द.अफ्रिका)
विकेट : ११, औषत : ६.२७, उत्कृष्ट ३/२

भारतले उपाधि जिते पनि आइसिसीको नजरमा आइसिसी ड्रिम ११ को नेतृत्व गर्न सक्ने खेलाडीका रूपमा दक्षिण अफ्रिकाकी कायला हुन् । प्रतियोतिगामा उनले प्रत्येक खेलमा जसो विकेट लिँदे दक्षिण अफ्रिकालाई दोस्रो प्रयासमै फाइनल स्थान पक्का गरिन् । यद्यपि, उपाधि भिडन्तमा भारतसँग नराम्रोसँग पराजित हुँदा दक्षिण अफ्रिकाका लागि कायलाले उत्कृष्ट प्रदर्शन गरिन् । उनले समग्रमा ११ विकेट लिइन् । उनको इकोनोमी ४.१४ रहेको छ । जुन प्रतियोगिताकै उत्कृष्ट मानिएको थियो । आवश्यक परेको वेला उनको ब्याटिङ चलेको थियो । यसको उदाहरण उनले सेमिफाइनलमा अस्ट्रेलियाविरुद्ध देखाइन् । सो खेलमा उनले २६ रनको योगदान दिइन् ।

८. काटिए जोनेस (विकेटकिपर), (इंग्ल्यान्ड)
आउट : ९ (२ क्याच, ७ स्टम्पिङ)

आइसिसीको ड्रिम ११ मा विकेटकिपिङ जिम्मेवारी इंग्ल्यान्डक जोनेसले पाइन् । विकेट पछाडि उभिएर उनले विपक्षी खेलाडीहरूलाई सहज रन लिन दिइनन् । विकेट किपरका रुपमा असाधारण प्रदर्शन गरेकी जोनेसले नौ ब्याट्सम्यानलाई आउट गरिन् । यसक्रममा उनले दुई क्याच समेत लिइन् । सात विपक्षी ब्याट्सम्यान लामो सट प्रहार गर्न अगाडि आउँदा उनले स्टम्पिङ गर्न सफल भइन् । न्युजिल्यान्डविरुद्धको एक खेलमा उनले चार स्टम्पिङ र एक क्याच लिएकी थिइन् ।

९. आयुसी शुक्ला (भारत)
विकेटः १४, इकोनोमी : ३.०१, उत्कृष्ट ४/८ 

यसपटक भारतको बलिङ आक्रमण बलियो हुनुको पछाडि आयुसीको प्रदर्शन पनि थियो । भारत अपराजित रही उपाधि रक्षा गर्दा आयुशीले प्रतियोगिताको प्रत्येक खेलमा विकेट लिन सफल भइन् । आइसिसीको टोलीमा उनले ओपनिङ बलिङ जिम्मेवारी पाएकी छिन् । प्रतियोगितामा उनले स्कटल्यान्डविरुद्ध आठ रन खर्चेर चार विकेट लिएकी थिइन् । उनले विश्वकपमा १४ विकेट लिइन् । यसैगरी, फाइनलमा उनले दक्षिण अफ्रिकाविरुद्ध नौ रन खर्चेर महत्वपूर्ण दुई विकेट हात पारिन् ।

१०. चामोदी प्रावाडा (श्रीलंका)
विकेटः ९, इकोनोमी : ३.८०, उत्कृष्ट ३/५

आइसिसी यू–१९ विश्वकपमा प्रभावशाली प्रदर्शन गर्ने खेलाडीमा श्रीलंकाली चामोदी पनि हुन् । बायाँहाते स्पिनर यी खेलाडीले श्रीलंकाबाट चारै खेलमा सहभागी हुँदै विकेट लिइन् । उनले मलेसियाविरुद्ध तीन विकेट लिन पाँच रन मात्र खर्चेकी थिइन् । यसैगरी, बलियो प्रतिद्वन्द्वी वेस्ट इन्डिजसँगको प्रतिस्पर्धामा उनले तीन विकेट लिन १६ रन खर्चेकी थिइन् । आइसिसीको ड्रिम ११ मा प्रमुख स्पिनरमा उनी रहेकी छिन् ।

११. वैष्णवी शर्मा (भारत)
विकेटः १७, इकोनोमी : ४.३६, उत्कृष्ट ५/५
विश्वकपकै उत्कृष्ट बलिङ रेकर्ड राखेकी भारतीय वैष्णवीले मलेसियाविरुद्ध असाधारण प्रदर्शन गरेकी थिइन् । उनले पाँच रन दिएर मलेसियाका पाँचै खेलाडीलाई आउट गरी सनसनी मच्चाएकी थिइन् । बायाँहाते स्पिनर वैष्णवीले मलेसियासँगको खेल ह्याट्रिकसमेत गरिन् । स्पिनर खेलाडीका रूपमा उनले भारतको बलिङ नेतृत्व गरेकी थिइन् ।

– श्रीलोचन राजोपाध्याय एजेन्सीको सहयोगमा